საქართველოს მორაგბეთა ეროვნულმა ნაკრებმა, რაგბი ევროპის ჩემპიონატის 2025 წლის გათამაშება დომინანტური უპირატესობით მოიგო. ზედიზედ 8 წელია, ბორჯღალოსნები კვარცხლბეკის უმაღლესი საფეხურიდან სამართლიანად არ ჩამოსულან. სულ კი, ქართველებს რაგბი ევროპა 17-ჯერ აქვთ მოგებული.

რიჩარდ ქოქრილის გაწვრთნილმა გუნდმა, ფინალურ შეხვედრაში, მიხეილ მესხის სტადიონზე ესპანეთის ნაკრები 46:28 ანგარიშით დაამარცხა და დამსახურებულად აღმართა ევროპის ჩემპიონის თასი.

საქართველოს ნაკრებმა 8 ლელო გაიტანა. თითო ლელო დადეს ვასილ ლობჟანიძემ და ნიკა აბულაძემ. ჰეთ-თრიქი შეასრულა ვანო კარკაძემ, რომელიც მატჩის საუკეთესო მოთამაშე გახდა; ასევე, ჰეთ-თრიქით გამოიჩინა თავი აკა ტაბუცაძემ, რომლის სარეკორდო მიღწევაზე ცალკე ვისაუბრებთ.

გარდა იმისა, რომ ტაბუცაძემ ნაკრებში უკვე 50 ლელო დააგროვა, მისი მიღწევები საერთაშორისო დონეზეც რეზონანსული გახდა.

თუკი, ესპანეთთან მატჩამდე ქართველი მორაგბის სანაკრებო ანგარიშზე 47 ლელო ირიცხებოდა და მსოფლიოს საუკეთესო მელელოვეების ტოპ 10-ეულში იყო, ის მე-9 ადგილს იყოფდა ლეგენდარულ ირლანდიელთან, ბრაიან ო’დრისკოლთან. რაგბი ევროპის ჩემპიონატის ფინალში შესრულებული ჰეთ-თრიქის შემდეგ, ტაბუცაძემ ჯორჯ ნორზი (უელსი) და დაგ ჰაულეტიც (ახალი ზელანდია) უკან ჩამოიტოვა.

ამჟამად, აკა ტაბუცაძე, მსოფლიოს ტოპ 10-ეულში მეექვსე ადგილზეა და ამ პოზიციას რორი ანდერვუდთან (ინგლისი) იყოფს.

რაც შეეხება ტოპ ხუთეულს, მათგან არც ერთი აღარაა მოქმედი მოთამაშე. მაგალითად, მე-5 ადგილს ტაბუცაძეს მხოლოდ 5 ლელო აშორებს. ოპტიმისტურ პროგნოზებში უნდა ვივარაუდოთ, რომ ქართველი მორაგბე ამ „ბარიერსაც“ უახლოეს მომავალში გადალახავს.

რაც შეეხება მსოფლიო რაგბის რეიტინგს, ესპანეთთან მოგების შემდეგ, საქართველომ მე-11 ადგილი შეინარჩუნა და ყველაზე სერიოზულ მეტოქე — ექვსი ერის წარმომადგენელ უელსთან, უპირატესობა 1.3 ქულით გაზარდა.

თიბისი და დიდი რაგბი ზაფხულში, საინტერესო სანაკრებო ტესტ-მატჩებით დაბრუნდებიან. მანამდე კი, ერთად ვუგულშემატკივროთ ასაკობრივ ნაკრებებსა და 7-ქალა ნაკრებს მნიშვნელოვან ტურნირებზე.

#ერთადგავიმარჯვებთ