22 მარტს, 20:00 საათზე თბილისში "მეგობარი აქტის" მხარდამჭერი მარში გაიმართება. მოქალაქეები მარჯანიშვილის მოედანზე შეიკრიბებიან და მსვლელობით პარლამენტისკენ წავლენ.

"საქართველო ათწლეულებია ჰიბრიდული ომის მსხვერპლია! ჩვენ დღესაც ვებრძვით რუსულ მარიონეტულ რეჟიმს, რომელიც ემუქრება ქვეყნის დემოკრატიას, თავისუფლებასა და განვითარების შესაძლებლობებს. ვითარებას კიდევ უფრო ამძაფრებს ჩინური და ირანული გავლენების ზრდა საქართველოში, რაც უკვე დიდი საფრთხეა მთელი რეგიონისთვის. ქართველი ხალხი არ ნებდება და განაგრძობს ბრძოლას! 100 დღეზე მეტია, გმირულად იბრძვის უწყვეტი პროტესტით.

თავისუფლება, დემოკრატია და ადამიანის უფლებები, ის ღირებულებებია, რომელიც ჩვენ და აშშ-ს გვაერთიანებს. სწორედ ამიტომ ამერიკა უკვე 35 წელია საქართველოს მთავარი სტრატეგიული პარტნიორია. ამ რთულ პერიოდში კი "მეგობარი აქტი" სასიცოცხლო მნიშვნელობის ინსტრუმენტია, რომელიც დაეხმარება საქართველოს რუსული, ჩინური და ირანული გავლენების დაძლევასა და დემოკრატიის განმტკიცებაში.

საქართველოს მოქალაქეებს კი ვთხოვთ, ერთად ვიდგეთ და ვაჩვენოთ მსოფლიოს, რომ საქართველო ირჩევს თავისუფლებას, დემოკრატიასა და დასავლურ მომავალს!

ერთად გავიმარჯვებთ!", — წერია ორგანიზატორების მიერ გავრცელებულ განცხადებაში.

ცნობისათვის, 27 მარტს, ამერიკის შეერთებული შტატების სენატის საგარეო საქმეთა კომიტეტი "მეგობარი აქტს" განიხილავს.

ამავე თემაზე:

ჯო უილსონი: ქართველი ხალხი მტკიცედ მოითხოვს არჩევნებს გაყალბების გარეშე

ამერიკელმა სენატორებმა ჯიმ რიშმა და ჯინ შაჰინმა სენატში MEGOBARI Act-ი წარადგინეს

აშშ-ის სენატის საგარეო ურთიერთობათა კომიტეტი MEGOBARI აქტთან დაკავშირებით შეხვედრას 11 მარტს გამართავს

MEGOBARI ACT-ს, სადაც "ოცნების" მაღალჩინოსნებისთვის სანქციების დაწესებაზეა საუბარი, სენატის საქმეთა კომიტეტი სავარაუდოდ მომავალ კვირაში განიხილავს