თურქეთში, სტამბოლის მერის, ექრემ იმამოღლუს დაკავებასთან დაკავშირებით სოციალურ ქსელში "პროვოკაციული" პოსტების გამოქვეყნების ბრალდებით 37 ადამიანი დააკავეს და გრძელდება ძალისხმევა დარჩენილი ეჭვმიტანილების დასაკავებლად — ამის შესახებ Reuters-ს ცნობით, თურქეთის მთავრობამ განაცხადა.

თურქეთის შინაგან საქმეთა მინისტრმა, ალი იერლიკაიამ სოციალურ პლატფორმა X-ზე დაწერა, რომ ხელისუფლებამ გამოავლინა სოციალური მედიის 261 ანგარიში, მათ შორის 62 ქვეყნის ფარგლებს გარეთ, სადაც იმამოღლუსა და 105 სხვა პირის დაკავებასთან დაკავშირებით "დანაშაულისა და სიძულვილის წამქეზებელი პროვოკაციული პოსტები" გამოაქვეყნეს.

მინისტრის თქმით, სტამბოლის მერის დაკავების შემდეგ სოციალურ პლატფორმა X-ზე მის შესახებ 18.6 მილიონი პოსტი გააზიარეს.

შეგახსენებთ, თურქეთის ხელისუფლებამ თურქეთის, პრეზიდენტი რეჯეფ თაიფ ერდოღანის მთავარი კონკურენტი, სტამბულის მერი ექრემ იმამოღლუ კორუფციისა და ტერორის გამოძიების ფარგლებში დააკავა.

როგორც თურქული მედია წერს, მთავარ ოპოზიციურ რესპუბლიკურ სახალხო პარტიას (CHP) იმამოღლუ საპრეზიდენტო კანდიდატად უნდა დაესახელებინა. ერთი დღით ადრე, სტამბოლის უნივერსიტეტმა იმამოღლუს დიპლომი გაუუქმა, რითაც ფაქტობრივად პოპულარული ოპოზიციური ფიგურის საპრეზიდენტო არჩევნებიდან დისკვალიფიკაცია მოახდინა.

მიუხედავად სტამბოლის გუბერნატორის ბრძანებისა, "საზოგადოებრივი წესრიგის შესანარჩუნებლად" 23 მარტამდე ქალაქში აქციის გამართვია აკრძალულიყო, მერის დაკავებას საპროტესტო აქციები მოჰყვა. ინტერნეტ-დამკვირვებლის NetBlocks-ის ინფორმაციით, თურქეთში X-ზე, YouTube-ზე, Instagram-სა და TikTok-ზე წვდომა შეიზღუდა.

Reuters წერს, რომ ოთხშაბათს სტამბოლის პოლიციის მთავარ სამმართველოსთან მომიტინგეებმა განაცხადეს, რომ პრეზიდენტ რეჯეფ თაიფ ერდოღანის მთავარი პოლიტიკური კონკურენტის და ქალაქის მერის ექრემ იმამოღლუს დაკავება თურქეთის დემოკრატიისთვის დარტყმაა. მერისთვის დიპლომის ჩამორთმევის გამო, აქცია გამართეს ასევე სტამბოლის უნივერსიტეტის სტუდენტებმაც.

დემონსტრანტებსა და პოლიციას შორის შეტაკებებიც მოხდა. მედიის ინფორმაციით, პოლიციამ სტამბოლის უნივერსიტეტთან მიმდინარე აქციის დასაშლელად ე.წ. "წიწაკის სპრეი" გამოიყენა.