თბილისის მერი კახა კალაძე ოცნების პრემიერის, ირაკლი კობახიძის განცხადებას ეხმაურება იმის შესახებ, რომ თბილისის მერის არჩევნებში კახა კალაძის კანდიდატურა უალტერნატივოა.

"პირველ რიგში, მადლობას გადავუხდი პრემიერს პოზიტიური შეფასებისთვის. ის, რაც დედაქალაქში ბოლო წლების განმავლობაში გაკეთდა, მხოლოდ ჩემი დამსახურება არ არის. ეს მთლიანად გუნდის დამსახურებაა. მადლობა ყველა იმ ადამიანს, ვინც ჩართულია ამ პროექტების განხორციელებაში. მადლობა პრემიერ-მინისტრს თანადგომისა და მხარდაჭერისთვის.

რაც შეეხება მერობის კანდიდატს, ამასთან დაკავშირებით ცოტა მოგვიანებით გავაკეთებთ განცხადებას. შეიკრიბება პოლიტსაბჭო და ერთობლივად მივიღებთ გადაწყვეტილებას, როგორც მერობის კანდიდატებზე, ასევე ვინ იქნება საკრებულოში ჩვენი წარმომადგენელი", — აღნიშნა დედაქალაქის მერმა.

მანამდე, ოცნების პრემიერმა, ირაკლი კობახიძემ "პირველ არხთან" ინტერვიუში განაცხადა, რომ თბილისის მერის არჩევნებში კახა კალაძის კანდიდატურა არის უალტერნატივო.

"რაც შეეხება თბილისის მერის არჩევნებს, კახა კალაძის კანდიდატურა არის უალტერნატივო. ვნახოთ, პოლიტიკური საბჭო რა გადაწყვეტილებას მიიღებს. თქვენ იცით, რომ მერობაზე არ არის არავითარი შეზღუდვა და საერთაშორისო პრაქტიკაც ეგ არის, ანუ განუსაზღვრელი რაოდენობით არის შესაძლებელი კენჭისყრა მუნიციპალიტეტის მერის პოზიციაზე. ნებისმიერ ქვეყანაში ასეა და ასეა საქართველოშიც. შეგვიძლია გავიხსენოთ ის საქმეები, რაც გაკეთდა თბილისში, სხვადასხვა მიმართულებით, მარტო რად ღირს რეკრეაცია, გამწვანების მიმართულება, ქუჩებისა და გამზირების მოწესრიგება. მიუხედავად იმისა, რომ ავტომობილების რაოდენობა გაზრდილია 3-ჯერ, 2012 წლის შემდეგ, რეალურად, მუდმივ რეჟიმში მიმდინარეობს მუშაობა იმისათვის, რომ ამან არ მოახდინოს მოძრაობის არსებითად ბლოკირება ჩვენს დედაქალაქში. ამისთვის სერიოზული ცვლილებები გატარდა ტრანსპორტის სფეროში და სამომავლოდაც ვფიქრობ, რომ ძალიან ძლიერი პროგრამა ექნება წარმოდგენილი კახა კალაძეს ამ მხრივ. შესაბამისად, ვფიქრობთ, რომ პირველ რიგში თბილისში და ყველა სხვა მუნიციპალიტეტში მოვიგებთ მერის არჩევნებს, საკრებულოს არჩევნებს", — თქვა კობახიძემ.