მსოფლიოში კინომოყვარულებს უფრო მეტი თრილერისა და კომედიის ჟანრის ფილმების ხილვა სურთ. ამაზე მიუთითებს გლობალური კინოფონდის კვლევა, რომლის ფარგლებშიც 15 კინობაზარზე 68 ათასზე მეტი რესპონდენტი გამოიკითხა. კვლევა ასკვნის, რომ კინოთეატრში უფრო იშვიათად სიარულის მთავარი მიზეზი მაყურებლისთვის სწორედ ნაკლებად საინტერესო თემატიკის ფილმებია.

უფრო დეტალურად, კვლევის შედეგები ასე იშლება:

  • 72% მიიჩნევს, რომ კინოთეატრში ფილმის სანახავად ფულის გადახდა ღირს;
  • 55% ისურვებდა, კინოთეატრებში უფრო მეტი სათავგადასავლო და მძაფრსიუჟეტიანი ფილმი ეხილა;
  • 51%-ს უნდა, იუმორისტული თემატიკის ფილმები ნახოს უფრო ხშირად;
  • 46% კი უპირატესობას თრილერებს ანიჭებს;
  • კინომოყვარულები 45 წლის ასაკს ზემოთ ყველაზე უკმაყოფილოები არიან ფილმების თემატიკით, იმის მიუხედავად, რომ კინოთეატრში სიარულის სურვილი და დრო აქვთ;
  • ამის მიუხედავად, გამოკითხულთა 68% მოახლოებულ პრემიერებს მოუთმენლად ელოდება;
  • 64 პროცენტისთვის არ არსებობს დამაბრკოლებელი ფაქტორი, როცა კინოთეატრში ფილმის ნახვა სურთ;
  • და მხოლოდ 6% ამჯობინებს, დაიცადოს და ფილმს ონლაინ სტრიმინგ პლატფორმაზე უყუროს.

კვლევა ასევე მიუთითებს, რომ რესპონდენტები, ზოგადად, უფრო ნაკლებს ხარჯავენ გართობაზე, თუმცა, 44 წლამდე ასაკის გამოკითხულები იმაზე მეტ ფულს იხდიან, ვიდრე ექვსი თვის წინ.

ფოტო: Getty Images

"გლობალური კინოფონდის ერთ-ერთი მიზანია, მსოფლიოში კინომოყვარულების ინტერესები შეისწავლოს და ეს კინოინდუსტრიის წარმომადგენლებს გაუზიაროს, რათა მათ მოთხოვნებს უკეთ ვუპასუხოთ", — ამბობს ფონდის ხელმძღვანელი, ჯეინ ჰასტინგსი, — "ხშირად საუბრობენ, როგორ მიიზიდონ მეტი მაყურებელი კინოთეატრებში, პასუხი კი ცალსახაა: უფრო მეტი ისეთი ფილმის გამოშვებით, რომელთა ხილვაც მომხმარებლებს სურთ. რესპონდენტები ამბობენ, რომ მათთვის დამაბრკოლებელი ფაქტორი არ არსებობს, თუკი ფილმის კინოთეატრში ნახვა უნდათ".

უცნობია, თუ რამდენად ითვალისწინებენ კინო და სატელევიზიო ინდუსტრიაში მსგავსი კვლევის შედეგებს. თუმცა, ფილმებსა და სერიალებში თემატიკის ტენდენცია რომ მაყურებლისთვის არცთუ საინტერესოა, ამას სხვა არაერთი გამოკითხვაც უსვამს ხაზს.

მაგალითად, 2023 წელს ჩატარებულმა კვლევამ დაასკვნა, რომ მოზარდებსა და ახალგაზრდებს "ფილმებსა და სერიალებში ნაკლები სექსის და მეტი მეგობრობის ხილვა სურთ". კვლევაში მონაწილე 1500 პირიდან 44,3 პროცენტმა განაცხადა, რომ ფილმებსა და სერიალებში რომანტიკა ჭარბი დოზითაა, 47,5 პროცენტის აზრით კი, "სიუჟეტებში სექსი ზედმეტია".

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...