არგენტინის ნაკრების კაპიტნის ლიონელ მესის თქმით, 2018 წლის მსოფლიო ჩემპიონატი მისთვის, შესაძლოა, უკანასკნელი შანსი იყოს. ბარსელონას ფორვარდს ბოლო სამი სანაკრებო ფინალი აქვს წაგებული: ორი კოპა ამერიკაზე და ერთიც მსოფლიო ჩემპიონატში.

"არგენტინიდან წამოსული კრიტიკა გულს მტკენს. კარგი თამაში მხოლოდ გოლების გატანას არ გულისხმობს, არამედ ბურთთან შეხებას, კარგი გადაწყვეტილებების მიღებას, ბურთის არ დაკარგვას და ა.შ. ადრე ინდივიდუალურ თამაშს ვცდილობდი, ახლა კი გუნდურ თამაშზე გადავერთე", - აღნიშნა არგენტინის ნაკრების კაპიტანმა.

მან ესპანურენოვან მედიასთან ინტერვიუს დროს წაგებულ თამაშებზეც ისაუბრა:

"წაგებული ფინალების გამო არაერთხელ მიტირია. მიტირია იმის გამო, რომ ჩემი ერის ოცნება რეალობად ვერ ვაქციე".

მესის თქმით, მსოფლიოს თასის მოგება ძალიან რთულია, თუმცა მიზნის მიღწევასთან ახლოს იყვნენ.

"ფეხბურთი სიურპრიზებითაა სავსე, ყოველთვის საუკეთესო გუნდი არ იმარჯვებს. ამ ფაქტთან შეგუება უკვე ვისწავლე", - განაცხადა მესიმ ინტერვიუში.

შეგახსენებთ, რომ არგენტინის ნაკრებმა მსოფლიო ჩემპიონატი ბოლოს 1986 წელს მოიგო.