ესპანური მედიის ცნობით, ბარსელონასა და არგენტინის ეროვნული ნაკრების ფეხბურთელს, ლეო მესის 21-თვიანი პატიმრობა მიესაჯა.

მესის გადასახადების დამალვას ედავებოდნენ. პატიმრობა მიესაჯა ფეხბურთელის მამასაც. ინფორმაციას ამის შესახებ ესპანურ მედიაზე დაყრდნობით BBC ავრცელებს.

ერთ-ერთი ყველაზე გავლენიანი ესპანური გამოცემა El Pais წერს, რომ მესიმ თავისი მამის ხელშეწყობით 2007-2009 წლებში შემოსავლები დამალა და ესპანეთში გადასახადების გადახდას აარიდა თავი. საქმე ეხება 4.1 მილიონი ევროს დამალვას. როგორც გამოძიებამ დაადგინა, მესი ფულის დასამალად ურუგვაისა და ბელიზის ოფშორებს იყენებდა.

მესის ასევე მოუწევს მილიონობით ევროს ჯარიმის გადახდა. მიუხედავად ბარსელონას სასამართლოს გადაწყვეტილებისა, შესაძლოა მესის მამასთან ერთად ციხეში ჩაჯდომა არ მოუწიოს. ესპანური კანონმდებლობით, პირებს, რომლებსაც პატიმრობას 2 წელზე ნაკლები ვადით უსჯიან, აღნიშნულს პირობითი სასჯელით უცვლიან. ამ შემთხვევაში, მესი პრობაციონერი იქნება.