"ჩვენ გულისყურით ვეკიდებით ჩვენი პარტნიორების წუხილს", - საგარეო საქმეთა მინისტრის მოადგილე, ვახტანგ მახარობლიშვილი საქართველოს მოქალაქეებისთვის უვიზო რეჟიმის შეწყვეტაზე, გერმანიის ერთ-ერთი მიწის, ჩრდილოეთ რაინ-ვესტფალიის მოთხოვნას ეხმაურება.

გერმანიის საზოგადოებრივი მაუწყებლის ინფორმაციით, გაზრდილი კრიმინალის მიზეზით, გერმანიის ჩრდილოეთ რაინ-ვესტფალიის მთავრობას სურს, რომ საქართველოს მოქალაქეებს უვიზო რეჟიმი შეეზღუდოთ.

მინისტრის მოადგილე მოუწოდებს ყველა მოქალაქეს, რომ ევროკავშირთან ვიზალიბერალიზაციის მხოლოდ დაშვებული პირობებით ისარგებლონ, რაც გულისხმობს მხოლოდ ტურისტული და მოკლე ვადიანი, 90 დღიანი ვიზიტით, შენგენის ქვეყნებში გამგზავრებას.

ვახტანგ მახარობლიშვილის თქმით, საქართველო გერმანიასთან მჭიდროდ თანამშრომლობს ორგანიზებულ დანაშაულთან ბრძოლის სფეროში:

"გასულ წელს შესაბამისი შეთანხმებაც გაფორმდა. ჩვენ ასევე ვთანამშრომლობთ გერმანიის არამარტო ცენტრალურ ხელისუფლებასთან, არამედ გერმანიის ფედერაციული რესპუბლიკის ცალკეულ მიწებთან. გასულ წელს რანდენიმე მხარეში გაიმართა საქართველოს შსს მინისტრის ვიზიტი და მათ შორის ოთხ მიწასთან გაფორმდა თანამშრომლობის შეთანხმება. ჩვენ გავაგრძელებთ ამ მიმართულებით თანამშრომლობას და ასევე, აქტიურად ვიმუშავებთ რეინ-ვესტფალიის მთავრობასთან".

მახარობლიშვილის განცხადებით, მნიშვნელოვანია, რომ საქართველოს თითოეულმა მოქალაქემ გააცნობიერონ პასუხისმგებლობა და გაუფრთხილდნენ იმ მონაპოვარს, რომელიც მისივე თქმით, საერთო ძალისხმევის შედეგია:

"გასათვალისწინებელია, რომ საქართველო არის უსაფრთხო ქვეყანა და თავშესაფრის არალეგიტიმური მოთხოვნა არ დაკმაყოფილდება ევროკავშირის წევრი ქვეყნების მხრიდან. ხშირად, მოქალაქეები შეცდომაში არიან შეყვანილი, ცრუ დაპირებებით კერძო პირების მხრიდან, რის შედეგადაც ქვეყნისთვის ზიანის გარდა, პირად ფინანსური ზარალსაც იღებენ".

WDR-ის ცნობით, რეგიონი იზრუნებს იმაზე, რომ გერმანიის ყველა მიწაზე, საქართველოს მოქალაქეებისთვის უვიზო მიმოსვლა შეწყდეს. გამოცემის ცნობით, ამის მიზეზი ის პრობლემებია, რასაც მათივე თქმით, თავშესაფრის მაძიებელი საქართველოს მოქალაქეები ქმნიან. კერძოდ, პრობლემები შეიქმნა ლტოლვილთა საცხოვრებელში ოერლინგაუსენში.

თავშესაფრის მინიჭების ევროპული სააგენტოს (EASO) სტატისტიკით, 2016 წელთან შედარებით, 2017 წელს ევროკავშირის წევრ ქვეყნებში თავშესაფრის მაძიებელი საქართველოს მოქალაქეების რიცხვი 35 პროცენტით გაიზარდა.