"სოციალური სამართლიანობის ცენტრმა" და "საქართველოს ახალგაზრდა იურისტთა ასოციაციამ" (საია) ევროპის საბჭოს მინისტრთა კომიტეტს "მაქარაშვილის ჯგუფის" საქმეების აღსრულებასთან დაკავშირებით განახლებული ანგარიში წარუდგინეს. დოკუმენტი 2025-2026 წლებში საქართველოში შეკრებისა და გამოხატვის თავისუფლების კუთხით შექმნილ საგანგაშო მდგომარეობას მიმოიხილავს — ინფორმაციას საია ავრცელებს

სამოქალაქო საზოგადოების შეფასებით, ქვეყანაში სამოქალაქო და პოლიტიკური თავისუფლებების სტანდარტები მკვეთრად გაუარესდა. ანგარიშში ხაზგასმულია რამდენიმე კრიტიკული მიმართულება:

  • ცვლილებები შეკრების და გამოხატვის თავისუფლების მარეგულირებელ კანონმდებლობაში, რომლებიც ახდენს მშვიდობიანი შეკრების კრიმინალიზებას, მნიშვნელოვნად ავიწროვებს დასაშვები კრიტიკის სივრცეს და ეწინააღმდეგება ევროპული კონვენციის მოთხოვნებს;

  • ე.წ. "ავტორიტარული კანონები" გამოიყენება აქტივისტების, ჟურნალისტებისა და უფლებადამცველების წინააღმდეგ რეპრესიების ინსტრუმენტად;

  • სამართალდამცავების მიერ ადმინისტრაციული კანონმდებლობის თვითნებურ გამოყენებაზე ეფექტიანი სასამართლო კონტროლი არ ხორციელდება;

  • ხელისუფლება აქტიურად იყენებს სახის ამომცნობ ტექნოლოგიებს აქციების მონაწილეთა იდენტიფიცირებისა და შემდგომი დასჯის მიზნით, რაც საერთაშორისო სტანდარტების უხეში დარღვევაა;

მიუხედავად მინისტრთა კომიტეტის მოთხოვნისა, ხელისუფლებამ არ წარადგინა სრულყოფილი სტატისტიკა პროტესტებთან დაკავშირებული ადმინისტრაციული სამართალწარმოების შესახებ. ასევე, სახელმწიფოს მიერ წარმოდგენილი სამოქმედო გეგმა არ შეიცავს ინფორმაციას გამოხატვის თავისუფლების გასაუმჯობესებლად გადადგმული ნაბიჯების თაობაზე.

"სამწუხაროდ, ხელისუფლებამ 2025 წლის მინისტრთა კომიტეტის მოთხოვნა არ შეასრულა, რომ წარმოედგინა სტატისტიკური მონაცემები პროტესტებთან დაკავშირებით ადმინისტრაციული კანონმდებლობის აღსრულების თაობაზე, რაც სრულყოფილი სურათის წარმოდგენის შესაძლებლობას არ იძლევა, თუმცა ჩვენს ხელთ არსებული მონაცემებითაც ცხადია, რომ მშვიდობიანი პროტესტის მონაწილეების წინააღმდეგ რეპრესიების მასშტაბი საგანგაშოდ გაზრდილია" — ნათქვამია "საიასა" და "სოციალური სამართლიანობის ცენტრის" განცხადებაში.

ცნობისთვის, "მაქარაშვილის ჯგუფი" აერთიანებს ევროპული სასამართლოს (ECHR) მიერ საქართველოს წინააღმდეგ მიღებულ გადაწყვეტილებებს, სადაც დადგინდა თავისუფლების, სამართლიანი სასამართლოს, შეკრებისა და გამოხატვის უფლებების დარღვევა.

2025 წლიდან აღნიშნული ჯგუფი გაძლიერებული ზედამხედველობის ქვეშ იმყოფება, რაც იმას ნიშნავს, რომ ევროპის საბჭო მას სისტემურ პრობლემად განიხილავს და პროგრესს ყოველწლიურად აფასებს.

ევროპის საბჭოს მინისტრთა კომიტეტი მაქარაშვილის საქმეების აღსრულების საკითხს 2026 წლის 9-11 ივნისს ჩანიშნულ სხდომაზე განიხილავს. სამოქალაქო სექტორისთვის აღნიშნული პლატფორმა რჩება საერთაშორისო ადვოკატირების უმნიშვნელოვანეს ბერკეტად ხელისუფლების ანგარიშვალდებულების მისაღწევად.