ლონდონის ებრაულ უბანში პოლიციამ დააკავა კაცი, რომელიც გამვლელებს ცივი იარაღით დაესხა თავს. დაშავებულია ორი ადამიანი, მათ დახმარებას მედიკოსები უწევენ — ინფორმაციას Deutsche Welle ავრცელებს.

თვითმხილველების თქმით, დანით შეიარაღებული გოლდერს გრინ როუდზე ებრაული თემის წარმომადგენლებს მისდევდა და მათ დაჭრას ცდილობდა. ორგანიზაცია Shomrim-ის მოხალისეებმა ეჭვმიტანილი პოლიციის მოსვლამდე შეაკავეს. ადგილზე მისულმა სამართალდამცავებმა ეჭვმიტანილის წინააღმდეგ ელექტროშოკი გამოიყენეს და დააპატიმრეს.

გაერთიანებული სამეფოს პრემიერმინისტრმა, კირ სტარმერმა, ინციდენტს "ღრმად შემაშფოთებელი" უწოდა და ოთხშაბათს გამართულ საპარლამენტო სესიაზე განაცხადა, რომ საქმეზე დაწყებულია გამოძიება.

"ეს ფაქტი ამ დარბაზში მყოფ თითოეულ ადამიანს აღელვებს. ჩვენ ყველაფერი უნდა გავაკეთოთ გამოძიების მხარდასაჭერად და მკაფიოდ გამოვხატოთ ჩვენი ნება, რომ მსგავს სამართალდარღვევებს, რომელთა მომსწრენიც ბოლო დროს ძალიან ხშირად ვხდებით, მკაცრად დავუპირისპირდეთ" — განაცხადა პრემიერმა.

ცნობისთვის, ჩრდილოეთ ლონდონში, სადაც ებრაული თემის მრავალრიცხოვანი წარმომადგენლობა ცხოვრობს, ბოლო კვირებში ანტისემიტური ნიადაგზე ჩადენილმა დანაშაულების რაოდენობამ მკვეთრად იმატა. ეს ტენდენცია ირანთან ომის დაწყების ფონზე გამძაფრდა.

ბოლო პერიოდში დაფიქსირდა რამდენიმე სხვა მძიმე ინციდენტიც: სინაგოგის გადაწვის მცდელობა და თავდასხმა სასწრაფო დახმარების ავტომობილებზე.