პარლამენტში ინტერპელაციის წესით ჯანდაცვის უწყების ხელმძღვანელს, მიხეილ სარჯველაძეს მოუსმინეს. ის პარტია გახარია საქართველოსთვის წევრებმა დაიბარეს და დიუშენის კუნთოვან დისტროფიასთან დაკავშირებული კითხვებით მიმართეს.

სარჯველაძის გამოსვლამდე პარლამენტის ტრიბუნიდან პარტია "გახარია საქართველოსთვის" წევრმა, ქეთევან ბაკარაძემ ისაუბრა და მინისტრს "ადამიანების სიცოცხლისთვის საშიში თანამდებობის პირი" უწოდა.

"2025 წელს საქართველოში დაახლოებით 38 ათასი ბავშვი დაიბადა, ხოლო გარდაცვლილთა რიცხვმა 44 ათას ადამიანს მიაღწია. გესმით, რომ ეს დემოგრაფიული კატასტროფაა?

იცით, რამდენია რიცხვი იმ ოჯახების, რომლებსაც სამშობლოს დატოვება მოუწიათ, რადგან ოჯახის წევრი ონკოპაციენტი ჰყავს?

რადგან, საკუთარ ქვეყანაში სამკურნალოდ ფული არ აქვს?

იგივე რეალობის წინაშე დგანან ქრონიკული დაავადებების მქონე ადამიანები და ის მოქალაქეები, რომლებიც არცერთ მიზნობრივ პროგრამაში არ ხვდებიან და არც კერძო დაზღვევის ფუფუნება აქვთ. დღეს ჩვენი მოქალაქეებისთვის ავად გახდომა განაჩენია, რადგან გაზრდილი ფასების ფონზე ვერც მედიკამენტებს ყიდულობენ, ხშირ შემთხვევაში ექიმი ან ადგილზე არ ჰყავთ, ან იმდენად ძვირია სამედიცინო მომსახურების ტარიფი, რომ ვიზიტისგან თავს იკავებენ. ამ დროს კი, სამწუხაროდ სახელმწიფო არ დგას ხალხის გვერდში.

ჯანდაცვის სამინისტრო არ არის მოწყალების სააგენტო.
ის არის სახელმწიფო ინსტიტუცია, რომელიც ვალდებულია იზრუნოს მოქალაქეების ჯანმრთელობასა და მათ სოციალურ გარანტიებზე. არც ამ სამინისტროს ბიუჯეტი არ არის თქვენი პირადი ქონებრივი საკუთრება, ეს საქართველოს მოქალაქეების ფულია, რომელიც მათსავე კეთილდღეობას უნდა მოხმარდეს. თქვენ ვალდებული ხართ დაიცვათ ყველაზე მთავარი — ადამიანის სიცოცხლე და ჯანმრთელობა! თქვენ არ ხართ უბრალოდ წარუმატებელი მინისტრი. თქვენ ხართ ადამიანების სიცოცხლისთვის საშიში თანამდებობის პირი," — განაცხადა ბაკარაძემ.

სარჯველაძემ ინტერპელაციის წესით გამოსვლამდე ბაკარაძეს ტრიბუნიდან უპასუხა და მისი გამოსვლა "უსინდისობად" და "უტიფრობად" შეაფასა.

"ამას პოლიტიკური პოპულიზმი და დემაგოგია კი აღარ ჰქვია, სიტყვა "უსინდისოსაც" სიტყვა "პოლიტიკურის" დაყოლებაც აღარ უნდა, ეს არის უბრალო ადამიანური უსინდისობა, უტიფრობა და ჩემდა გასაკვირად, დიდი დილეტანტიზმი. დილეტანტიზმი და ამავდროულად ამორალობაც," — განაცხადა სარჯველაძემ.