დღეს დილიდან, მარნეულის მუნიციპალიტეტში, სოფელ შულავერში, ადგილობრივები შეიკრიბნენ და პროდუქციის რეალიზაციასთან დაკავშირებული პრობლემების გამო მარნეულის მერთან, დაურ ისმაილოვთან შეხვედრას ითხოვდნენ.

მიუხედავად აქციის მონაწილეთა მოთხოვნისა, მერი ადგილზე არ მივიდა, რამაც სიტუაციის დაძაბვა და მაგისტრალის გადაკეტვის მცდელობა გამოიწვია.

აქციის მიმდინარეობისას 2 პირი ადმინისტრაციულ სამართალდარღვევათა კოდექსის 173-ე მუხლით განსაზღვრული ქმედებისათვის დააკავეს, რაც სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას გულისხმობს. აღნიშნული სამართალდარღვევა ითვალისწინებს ჯარიმას 2 000 ლარიდან 5 000 ლარამდე ოდენობით ან ადმინისტრაციულ პატიმრობას 60 დღემდე ვადით. — ინფორმაციას ადგილობრივი მედია ავრცელებს.

აქციის მონაწილეები დაკავებული პირების გათავისუფლებას ითხოვდნენ და მანამდე არ აპირებდნენ დაშლას, სანამ დაკავებულები არ გათავისუფლდებოდნენ.

მოგვიანებით, ფერმერებს მერის მოადგილე, როინ გოდაბრელიძე შეხვდა, რომელმაც მათ საქმეში გარკვევა და საკითხის განსახილველად მერიის შენობაში გადასვლა შესთავაზა. მერის მოადგილე აქციის მონაწილეებთან ერთად ელოდებოდა დაკავებული პირების გათავისუფლებას

ამ დროისთვის, აქციაზე დაკავებულმა ორივე პირმა პოლიციის შენობა დატოვა და ისინი კვლავ აქციის მონაწილეებს შეუერთდნენ.

მარნეულის მერის მოადგილის, გიორგი გოდაბრელიძის განცხადებით, შეიქმნება 5-კაციანი საინიციატივო ჯგუფი, რომელიც მერიის წარმომადგენლებთან ერთად განიხილავს პროდუქციის რეალიზაციასთან დაკავშირებულ პრობლემებს.