პარლამენტში ინტერპელაციის წესით მიხეილ სარჯველაძეს მოუსმინეს. ის პარტია გახარია საქართველოსთვის წევრებმა დაიბარეს და დიუშენის კუნთოვან დისტროფიასთან დაკავშირებული კითხვებით მიმართეს.

სარჯველაძე უარყოფს ფაქტს, რომ უწყებამ დიუშენით დაავადებული ბავშვების მშობლებს განუცხადა, რომ "თუ ხუთ წელზე ნაკლები სიცოცხლე აქვს ვინმეს დარჩენილი, მას წამალი არ ეკუთვნის".

ასევე მისი განმარტებით, დიუშენის წამალთან დაკავშირებით "ფასი არც პირველ და არც მეორეხარისხოვან საკითხთა რიგს არ მიეკუთვნება" და მათ მედიკამენტის უსაფრთხოებაზე ეპარებათ ეჭვი.

"ისეთ განცხადებებზე, რა თქმა უნდა, არ ვისაუბრებ ბევრს, რომ თითქოსდა რომელიმე მშობლისთვის მითქვამს, ესეც მომაწერეს, რომ თუ ხუთ წელზე ნაკლები სიცოცხლე აქვს ვინმეს დარჩენილი, მას წამალი არ ეკუთვნის. მსგავსი არასდროს გვითქვამს და არც მე და არც რომელიმე ჩვენს თანამშრომელს შეხვედრებისას არც გვიფიქრია და ვაცხადებ ამას სრული პასუხისმგებლობით. ეს არის უბრალოდ ტყუილი. მეტს აქ ვერაფერს დავამატებ.

იგივე ითქმის იმასთან დაკავშირებითაც, რომ თითქოსდა მხოლოდ ფასებზე ვსაუბრობდით მშობლებთან შეხვედრის დროს. არა, მსგავსი არაფერი ყოფილა. საგანგებოდ უნდა განვაცხადო: ჩვენთვის მედიკამენტის ფასი არც პირველ და არც მეორეხარისხოვან საკითხთა რიგს არ მიეკუთვნება. თუმცა კი, მარკეტინგულ მაღალ ინტერესი კი ნამდვილად განაპირობებს მათთვის, ვინც ამაზე "ხელის მოთბობას" ცდილობს. დიახ, როდესაც ათეულობით და ასეულობით მილიონ ლარზეა საუბარი, ეს აისახება მარკეტინგის აგრესიულობაზეც.

ახლა რაც შეეხება, მაგალითად, ისეთ მახინჯ ინტერპრეტაციებს, რომ თითქოსდა ჩვენი პოზიციაა, რომ ვეძებთ მხოლოდ გადარჩენის უნარის მქონე მედიკამენტებს და სხვას თითქოსდა აზრი არ აქვს. კიდევ ერთხელ ხაზგასმით ვიმეორებ იმას, რაც ვთქვი პირველივე ბრიფინგის დროს, როდესაც პირველად ვისაუბრე საჯაროდ ამ თემების ირგვლივ, თუმცა არაერთხელ მანამდე დახურულ კარს მიღმა სამუშაო ფორმატში ამის თაობაზე მისაუბრია და მითქვამს: ამ მედიკამენტების ფუნქცია არის ის, რომ გადაავადოს ეტლის საჭიროება.
სიტყვა-სიტყვით ვიმეორებ, რაც მაშინ ვთქვი. ვიმეორებ ეს იმისთვის, რომ ვინმემ არ გაიმეოროს მსგავსი რამ, რომ თითქოს ამ ფუნქციას რამენაირად ვაკნინებ.

აქვე ვიტყვი, რომ თავისთავად ეს მნიშვნელოვანი შედეგი იქნებოდა [საუბარია ეტლის გადავადებაზე], რომ არ არსებობდეს კითხვები მისი ეფექტიანობის და უსაფრთხოების შესახებ. მაგრამ არ იქნება სწორი, რომ ამ მედიკამენტზე გვქონდეს არასწორი მოლოდინი. ისიც იმიტომ ვთქვი, რომ ამორალურია არასწორი მოლოდინების შექმნა სასოწარკვეთილი მშობლებისთვის. კი, ნამდვილად, როდესაც ადამიანმა იცის რაზეა საუბარი, იცის რა ნაკლოვანებებზეა საუბარი და მაინც ხდება არასწორი მოლოდინების შექმნა, დიახ, ეს არის ამორალური," — განაცხადა სარჯველაძემ.

შეგახსენებთ, დიუშენის კუნთოვანი დისტროფიით დაავადებული ბავშვების მშობლებმა გუშინ ღამე მთავრობის კანცელარიასთან გაათენეს. ისინი სახელმწიფოსგან მედიკამენტის უზრუნველყოფას სთხოვენ.

მიხეილ სარჯველაძე: "დიუშენის განკურნებაზე პრეტენზიის მქონე მედიკამენტი დღეს მსოფლიოში არ არსებობს"