აშშ-ის სახელმწიფო დეპარტამენტი მალე დაიწყებს ახალი პასპორტების გაცემას, რომელთა შიდა გვერდზეც პრეზიდენტ დონალდ ტრამპის გამოსახულება იქნება დატანილი — ინფორმაციას CNN ავრცელებს.

აღნიშნული დიზაინი სტანდარტული ვერსია იქნება ვაშინგტონის საპასპორტო სააგენტოსთვის. ის გაიცემა მათზე, ვინც დოკუმენტის განახლების პროცედურას პირადად, სწორედ ამ ფილიალში გაივლის.

"ონლაინ განაცხადების ან სხვა ლოკაციების შემთხვევაში, პასპორტების არსებული დიზაინი უცვლელი დარჩება," — ნათქვამია განცხადებაში

პასპორტებში დონალდ ტრამპის პორტრეტის გამოჩენა მისი გამოსახულების გამოყენების ბოლო და ყველაზე მნიშვნელოვანი შემთხვევაა, რომელიც აშშ-ის დამოუკიდებლობის 250 წლისთავის აღსანიშნავად იქმნება. აღსანიშნავია ისიც, რომ სამახსოვრო მონეტის ან ეროვნული პარკის საშვისგან განსხვავებით, აშშ-ის პასპორტი საერთაშორისოდ აღიარებული საიდენტიფიკაციო საშუალებაა, რომელიც, როგორც წესი, 10 წლის განმავლობაშია ძალაში.

ტრამპის სახე და მისი ოქროსფერი ხელმოწერა პასპორტის შიდა ყდაზე იქნება განთავსებული.

"ივლისში აშშ დამოუკიდებლობის 250 წლისთავს აღნიშნავს, ამ ისტორიული თარიღის აღსანიშნავად, სახელმწიფო დეპარტამენტი ემზადება სპეციალური დიზაინის მქონე აშშ-ის პასპორტების შეზღუდული რაოდენობით გამოსაშვებად.", — განაცხადა სახელმწიფო დეპარტამენტის პრესსპიკერმა ტომი პიგოტმა.

მისივე თქმით, დოკუმენტში გამოყენებული იქნება ინდივიდუალური მხატვრობა და გაუმჯობესდება ვიზუალი, თუმცა შენარჩუნდება უსაფრთხოების ყველა ის მახასიათებელი, რაც ამერიკულ პასპორტს მსოფლიოში ერთ-ერთ ყველაზე დაცულ დოკუმენტად აქცევს.