"მაისის ბოლომდე კონკრეტულ შედეგებს იხილავთ, კონკრეტული მიმართულებებით კომუნიკაცია შედგება", — განაცხადა ირაკლი კობახიძემ "ტვ პირველის" ჟურნალისტის შეკითხვაზე: აპრილის დასაწყისში იყო დაანონსებული სიახლეები აშშ-სთან დაკავშირებით. ვისთან გაქვთ კომუნიკაცია?"

"ძალიან კონკრეტული გეგმები არსებობს, მაისის ბოლომდე კონკრეტულ შედეგებს იხილავთ, კონკრეტული მიმართულებებით კომუნიკაცია შედგება. რა და როგორ ამ დეტალებს ვერ გეტყვით, თუმცა ნახავთ რომ მაისის ბოლომდე გაღრმავდება კომუნიკაცია ქართულ და ამერიკულ მხარეებს შორის.

მე ასეთი ვადა არ მითქვამს, არ ვიცი, შეიძლება კახა კალაძემ თქვა კონკრეტულ კონტექსტში. ჩვენ გვაქვს კონკრეტული დღის წესრიგი ამერიკულ მხარესთან შეთანხმებული და არაერთი კომუნიკაცია შედგება მაისის ბოლომდე, კონკრეტულად ვამბობ ამ შემთხვევაში, მაისის თვეს, აპრილი არ მითქვამს, მაისს გეუბნებით", — განაცხადა ირაკლი კობახიძემ.

მაისის თვე დაასახელა აშშ-სთან ურთიერთობების გადატვირთვის თარიღად შალვა პაპუაშვილმაც.

ჟურნალისტის კითხვაზე — აქამდე გვესმოდა, რომ აპრილში მოხდებოდა კონკრეტული შეხვედრა აშშ-ს მხარესთან, დღეს ირაკლი კობახიძე ამბობს, რომ მაისი იქნება ის თვე, როცა იქნება აშშ-სთან ურთიერთობების გადატვირთვა. რა ელოდება საქართველოს აშშ-სთან ურთიერთობების გადატვირთვაში?, პაპუაშვილმა უპასუხა:

"მოვა მაისი და ნახავთ. მთავარი არის ერთი რამ: მას შემდეგ, რაც შედგა საუბარი საქართველოს პრემიერმინისტრსა და და აშშ-ს სახელმწიფო მდივანს შორის, ამ საუბარში მთავარი რამ გამოითქვა და მთავარ საკითხზე შეთანხმდნენ, რომ არის ორივე მხრიდან სურვილი, რომ ურთიერთობა გადაიტვირთოს. ჩვენი მხრიდან ითქვა რა არის კრიტერიუმი ჩვენთვის, როდის შეგვიძლია ითქვას, რომ ურთიერთობა ნამდვილად გადაიტვირთა, ჩვენი მთავარი კრიტერიუმი არის ახალი სტრატეგიული პარტნიორობის ჩამოყალიბება", — განაცხადა პაპუაშვილმა.

მიმდინარე წლის 2 აპრილს თბილისის მერმა, კახა კალაძემ აშშ-სა და საქართველოს ურთიერთობებზე საუბრისას თქვა, რომ აპრილში დაგეგმილია სხვადასხვა ტიპის შეხვედრები, რაც, იმედია, სასიხარულო იქნება ქართული საზოგადოებისთვის.