კლუბ ბასიანთან 13 იანვარს გამთენიისას დაცვის ორი წევრისა და პოლიციის თანამშრომლის დაჭრის საქმეზე ბრალდებული თამაზ ქვლივიძის ადვოკატი, ზაზა მესხი დანაშაულის დეტალებზე საუბრობს. მისი თქმით, მიყენებული ჭრილობები შემავალი არაა.

"მოხდა ურთიერთშელაპარაკების გამო, ორი პიროვნება დაჭრილია და სხეულის დაზიანება მიღებული აქვთ მხოლოდ და მხოლოდ გაშველების შედეგად. არცერთი ჭრილობა შემავალი არ არის... არც ერთს არა აქვს, უბრალოდ, დასერილი აქვთ, უბრალოდ ჩამოსობილი აქვთ [დანა]... ჩვენ გვექნება ექსპერტიზის დასკვნა, ჩვენ ვთანამშრომლობთ გამოძიებასთან, გვინდა, რომ საქმეზე დადგინდეს აბსოლუტური ჭეშმარიტება" - განუცხადა რუსთავი 2-ს ბრალდებულის ადვოკატმა.

ჭრილობის საილუსტრაციოდ On.ge გთავაზობთ ბასიანის დაცვის ერთ-ერთი წევრის ფოტოს.

ბასიანის წარმომადგენლის, ნაჯა ორაშვილის ინფორმაციით, მას შემდეგ, რაც 13 იანვარს თავდამსხმელი კლუბში არ შეუშვეს, მან კლუბის დაცვის უფროსს და დაცვის წევრებს რამდენიმე ჭრილობა მიაყენა. მისივე თქმით, ბრალდებულმა ჭრილობები მიაყენა დიდუბე-ჩუღურეთის სამმართველოს განყოფილების უფროსის მოადგილესაც.

15 იანვარს, კლუბ ბასიანის დაცვის წევრების დაჭრაში ბრალდებული თ.ქ. თბილისის საქალაქო სასამართლომ 30 ათას ლარიანი გირაოს სანაცვლოდ გაათავისუფლა. პროკურატურა პირისთვის აღკვეთის ღონისძიებად პატიმრობას ითხოვდა და საჩივრით სააპელაციო სასამართლოს მიმართა.