CNN ცნობისმოყვარე მოგზაურებისთვის 2018 წელს აუცილებლად სანახავი ქალაქების სიას აქვეყნებს. ყველაზე საინტერესო და მიმზიდველ ქალაქებს შორის თბილისიც მოხვდა.

ფოტო: cnn

"რაღაც ძალიან საინტერესო ხდება საქართველოს დედაქალაქ თბილისში", - წერს ავტორი და აღნიშნავს, რომ აქ სანახავი ბევრია.

სტატიაში ნათქვამია, რომ თბილისი არის ადგილი, სადაც მსოფლიოში ერთ-ერთ ყველაზე მზარდ მოდის ინდუსტრიას, საინტერესო ხელოვნების ნიმუშებსა და კრეატიული ადამიანების განუმეორებელ შემოქმედებას ნახავთ. ნათქვამია ასევე ისიც, რომ თბილისი 2018 წლის ლისაბონია.

"უახლოეს მომავალში ქალაქის ბიუჯეტიდან საზოგადოებრივი ტრანსპორტისა და ინფრასტრუქტურის განვითარებისთვის $334 მილიონის გამოყოფა არის დაგეგმილი.", - წერია სტატიაში.

ასევე ყურადღება გამახვილებულია მერსედეს-ბენცის მოდის კვირეულზე, კლუბურ ცხოვრებასა და ქართულ ღვინოზე.

ავტორს არ დავიწყებია ისიც, რომ 2017 წლის ნოემბერში თბილისს ამერიკელი რეჟისორი, დევიდ ლინჩი ეწვია.

2018 წელს აუცილებლად სანახავ ქალაქებს შორის ასევე იხილავთ ტორონტოს, მასკატს, დანდის, პარიზს, ტოკიოსა და სან-მიგელ-დე-ალიენდეს.