BBC-ის ინფორმაციით, ეგვიპტის ავიახაზების ჩამოვარდნილი თვითმფრინავის ე.წ. შავი ყუთების ჩანაწერების გაშიფვრამ დაადასტურა, რომ კატასტროფამდე ბორტზე კვამლი იყო.

2016 წლის 19 მაისს, თვითმფრინავი პარიზიდან კაიროს მიმართულებით ასრულებდა რეისს, რა დროსაც ხმელთაშუა ზღვაში გაუჩინარდა და ბორტზე მყოფი 66 ადამიანი დაიღუპა. სამგზავრო თვითმფრინავი, დაშვებამდე 20 წუთით ადრე, ხმელთაშუა ზღვის თავზე გაუჩინარდა. საბერძნეთის ხელისუფლების თქმით, მათმა სამხედრო რადარმა დააფიქსირა, თვითმფრინავის ჯერ მარცხნივ, შემდეგ კი 360 გრადუსით მარჯვნივ მობრუნება, 11 კილომეტრის სიმაღლიდან კი ვარდნა დაიწყო, დაახლოებით 4,5 კილომეტრის სიმაღლეზე კი რადარებიდან გაუჩინარდა.

ავტომატურმა ელექტრო შეტყობინებებმა, რომლებიც თვითმფრინავიდან იგზავნებოდა, აჩვენა, რომ გაუჩინარებამდე რამდენიმე წუთით ადრე, საპირფარეშოსა და პილოტის კაბინის ქვეშ, კვამლის დეტექტორები გაითიშა.

გამომძიებლების თქმით, შავი ყუთის მიერ ჩაწერილი მონაცემები შეესაბამება აღნიშნულ შეტყობინებებს.

მეორე შავი ყუთი რომელიც პილოტის კაბინაში იყო, ჯერ კიდევ შესწავლის პროცესშია, პარიზში.

ეგვიპტის საგამოძიებო კომიტეტის თქმით, თვითმფრინავის დამსხვრეული წინა მხარის ნაწილზე ჩანს მაღალი ტემპერატურისაგან მიღებული დაზიანება და ჭვარტლი.

ავიაკატასტროფის გამომწვევი მიზეზი ჯერ კიდევ დაუდგენელია.