რა მდგომარეობაა საქართველოში ევროპულ საკანონმდებლო აქტებთან დაახლოების მხრივ და როგორ შესრულდა ასოცირების სამოქმედო გეგმით გათვალისწინებული ვალდებულებები? - ევროპარლამენტის საგარეო პოლიტიკის დეპარტამენტმა ევროკავშირთან ასოცირებისა და თავისუფალი ვაჭრობის შესახებ შეთანხმების შესრულების მდგომარეობაზე კვლევა გამოაქვეყნა. დოკუმენტი სამ ქვეყანას, საქართველოს, მოლდოვასა და უკრაინას ეხება.

"როდესაც ევროკავშირმა საქართველოსთან მოკლევადიანი სავიზო რეჟიმი გააუქმა, თბილისმა ამით ყველაზე პრაქტიკულ ინტეგრაციას მიაღწია. საქართველომ მიიღო ძალიან მნიშვნელოვანი ანტიდისკრიმინაციული კანონი და საკანონმდებლო აქტები ადამიანის უფლებათა დასაცავად, თუმცა ჯერ კიდევ ბევრი კითხვა არსებობს სასამართლო სისტემისა და პროკურატურის დამოუკიდებულობასთან დაკავშირებით. ეს ინსტიტუტები და ზოგადად პოლიტიკური ცხოვრება, ყოფილი პრემიერ-მინისტრის, ბიძინა ივანიშვილის ძლიერი ზეგავლენის ქვეშაა", - წერია ევროპარლამენტის კვლევაში.

ღრმა და ყოვლისმომცველი თავისუფალი სავაჭრო სივრცის უფრო ხელშესახები შედეგების დანახვისათვის, კვლევის ავტორები დაინტერესებული მხარეების უფრო მეტად ინფორმირებულებაზე მიუთითებენ.

პოზიტიურად აფასებენ ენერგეტიკისა და კვების უსაფრთხოების სექტორში აღებული ვალდებულებების შესრულებას.

მიუხედავად ამისა, მაგალითად არის მოყვანილი საქართველოს ეკონომიკის განვითარების დონე მსოფლიო ბანკის მიხედვით, როგორც საშუალოზე მაღალი შემოსავლის მქონე ქვეყანა:

"სიღარიბეს, უთანასწორობის მაღალ მაჩვენებელსა და პატერნალისტურ მიდგომებს უარყოფითი ზეგავლენა აქვს ქართული პოლიტიკის დემოკრატიულობაზე, რამეთუ ქვეყნის ბევრ რეგიონში დომინირებენ ადგილობრივი "ბარონები", რომლებიც პოლიტიკურ კონკურენციას ახშობენ".

კვლევაში პრობლემად არის მიჩნეული ქალთა დაბალი ჩართულობა პოლიტიკურ ცხოვრებაში, რაც შეფასებულია, როგორც კიდევ ერთი ტრადიციული გამოწვევა პატრიარქალურ საზოგადოებაში.

კვლევაში აღნიშნულია, რომ საქართველოსთვის რუსეთის ბაზარი რუსეთ-საქართველოს ომის შემდეგ, 2013 წელს, ისევ გაიხსნა, შედეგად კი გაიზარდა ქართული ექსპორტი რუსეთში და რუსი ტურისტების რაოდენობა საქართველოში:

"მიუხედავად ამისა, მთავრობა არც ისე მონდომებული ჩანს რუსეთთან კიდევ უფრო სერიოზულ დიალოგში ჩაებას და ქვეყნის პრო-ევროპული მიმართულება კვლავ ძლიერი რჩება. ზოგიერთი უმნიშვნელოვანესი რეფორმის განხორციელების, 2012 წელს უსაფრთხო და მშვიდობიანი პოლიტიკური ცვლილებისა და რუსეთთან და ევროკავშირთან სავაჭრო ურთიერთობების ნორმალიზების შემდეგ, საქართველო ნამდვილად რჩება სამ ქვეყანას შორის "წარმატების მაგალითად".

ასოცირების ხელშეკრულებით გათვალისწინებული რეფორმების შეფასება

ევროპარლამენტის კვლევის თანახმად, 2014 წლიდან 2017 წლამდე 6 კანონი, 24 განკარგულება და 70 საკანონმდებლო ცვლილება მიიღო საქართველომ ევროკავშირის სამართლებრივ აქტებთან დასაახლოებლად.

ამათგან, სანიტრული და ფიტოსანიტარული სტანდარტიზაციის პროგრამა უმნიშვნელოვანესად არის მიჩნეული. თუმცა, ევროპარლამენტი მიღებული საკანონმდებლო აქტების განხორციელებას კვლავ საკვანძო გამოწვევად ტოვებს.

ევროპარლამენტი პოზიტიურად აფასებს იმას, რომ ევროკავშირის მაკრო-ფინანსური დახმარების პროგრამის (MFA) ფარგლებში, საქართველოში მნიშვნელოვანი პროგრესია სიღარიბის დაძლევის, უთანასწორობასთან ბრძოლის, მათ შორის, საყოველთაო, უნივერსალური სამედიცინო დაზღვევის სისტემისა და პენსიების ზრდის მხრივ.

კვლევაში ნათქვამია, რომ მიუხედავად კორუფციის წინააღმდეგ ბრძოლის გამოცდილებისა, რამდენიმე საკანონმდებლო აქტი მაინც განუხორციელებელი რჩება, მათ შორის ინფორმაციის თავისუფლების შესახებ კანონი და ახალი ეროვნული ანტი-კორუფციული სტრატეგია და სამოქმედო გეგმა.

ასევე, ნეგატიურად არის შეფასებული ისიც, რომ საქართველოს ჯერ კიდევ არ აქვს გარემოს ეროვნული თუ მდგრადი განვითარების პოლიტიკა, რაც კვლევის ავტორების აზრით, ეკონომიკურ სექტორთან ინტეგრაციას უზრუნველყოფდა.