ყაზახეთის პრეზიდენტმა ნურსულთან ნაზარბაევმა ხელი მოაწერა განკარგულებას, რომლის მიხედვითაც ყაზახური ენა ეტაპობრივად კირილიცადან ლათინურ ანბანზე გადავა.

განკარგულების მიხედვით, ლათინურ ანბანზე გადასვლა 2025 წლისთვის უნდა დასრულდეს. ამისათვის მთავრობაში ეროვნული კომისია შეიქმნება. ახალი ანბანი 32 ასოსგან შედგება.

პრეზიდენტის ინიციატივით ამ საკითხის განხილვა განხილვა ყაზახეთმა ჯერ კიდევ 2007 წელს დაიწყო. აპრილში ნაზარბაევმა ამასთან დაკავშირებით სპეციალური განრიგიც კი დააწესა.

"დღეს სკოლის კედლებში მოსწავლეები სწავლობენ ინგლისურ ენას და უპრობლემოდ ითვისებენ ლათინურ ასოებს. ამიტომაც მომავალი თაობისთვის ეს არანაირ პრობლემას არ წარმოადგენს... 2018 წლისთვის ახალი ანბანის სწავლებისთვის ჩვენ უნდა მოვამზადოთ სპეციალისტები და სახელმძღვანელოებიც ლათინურზე გადავიყვანოთ", - ნათქვამია პრეზიდენტის განცხადებაში.

ამ ეტაპზე ყაზახური ანბანი გამოიყენება ქვეყნის დიასპორის მიერ თურქეთსა და დასავლეთის რიგ ქვეყნებში, მაგრამ არანაირი ოფიციალური სტატუსი არ აქვს. ზოგიერთი ყაზახი, ძირითადად ჩინეთში, არაბულ ანბანს იყენებს.

პოსტსაბჭოთა სივრცის ქვეყნებში ლათინურ დამწერლობას იყენებენ ბალტიის ქვეყნები, მოლდოვა, ასევე აზერბაიჯანი, თურქმენეთი და უზბეკეთი. ლათინურ ანბანზე გადასვლის საკითხი წამოაყენა ყირგიზეთის პარლამენტის დეპუტატმა, მაგრამ პრეზიდენტმა საკითხი დაბლოკა.