ინდოელი მილიარდერის ვაჟმა კოლუმბიას დახმარება შესთავაზა იმ პრობლემის მოგვარებაში, რომელსაც ქვეყანა წლებია ებრძვის — საუბარია ბეჰემოთებზე, რომლებიც ცნობილ ნარკობარონ პაბლო ესკობარს უკავშირდება.

ფოტო: Sky News

ესკობარმა კოლუმბიაში უკანონოდ შეიყვანა ეგზოტიკური ცხოველები, მათ შორის ბეჰემოთები, რომლებსაც მოგვიანებით "კოკაინის ბეჰემოთები" შეარქვეს. მათი რაოდენობა მალ-მალე იზრდებოდა, კოლუმბიამ კი ამის გაკონტროლება სხვადასხვა მეთოდით სცადა — მათ შორის კასტრაციით — თუმცა, უშედეგოდ. საბოლოოდ, ხელისუფლებამ 80-მდე ცხოველის ამოწყვეტა გადაწყვიტა.

ანანტ ამბანი, აზიაში მცხოვრები უმდიდრესი ადამიანის, მუკეშ ამბანის ვაჟი, აცხადებს, რომ მზადაა, იზრუნოს ამ ცხოველებზე და თავის კერძო ზოოპარკში გადაიყვანოს, რომელიც ინდოეთის გუჯარათის შტატში მდებარეობს. კოლუმბიას ამ შეთავაზებაზე კომენტარი ჯერჯერობით არ გაუკეთებია.

ფოტო: Getty Images

ამბანის ზოოპარკის აღმასრულებელმა დირექტორმა კოლუმბიის გარემოს დაცვის მინისტრს გაუგზავნა წერილი, რომელშიც ნათქვამია, რომ ისინი მზად არიან, ბეჰემოტებზე იზრუნონ.

ესკობარს ბეჰემოთები თავის რანჩოში, ჰასიენდა ნაპოლესში, ჰყავდა გამომწყვდეული. მისი გარდაცვალების შემდეგ, ცხოველებს თავისუფლად გადაადგილების საშუალება მიეცათ და მდინარე მაგდალენას მახლობლად დასახლდნენ.

ფოტო: The Independant

აღსანიშნავია, რომ ამბანის ზოოპარკი 3.500 ჰექტარზეა გადაჭიმული და 2000-მდე ცხოველი ცხოვრობს, მათ შორის სპილოები, ვეფხვები და ა.შ.

თუმცა, კერძო ზოოპარკმა ველური ბუნების დამცველებისა და გარემოსდამცველების კრიტიკა მაინც დაიმსახურა. ამის ერთ-ერთ მიზეზი ისაა, რომ ინდოეთის ცხელი და მშრალი კლიმატი ზოგიერთი ცხოველისთვის შეუსაბამოა.

ფოტო: Reuters

შეგახსენებთ, რომ პაბლო ესკობარი მედელინის კარტელის მეთაური იყო. ესკობარს "კოკაინის მეფესაც" ეძახდნენ, რადგან მან მაიამისა და აშშ-ში ნარკოტიკების კონტრაბანდით, სავარაუდოდ, $30 მილიარდზე მეტი ქონება დააგროვა.

ფოტო: CNN

ესკობარის ტერორის ეპოქა ათწლეულზე მეტხანს გაგრძელდა და მოიცავდა გატაცებებს, მკვლელობებს, ქრთამს, აფეთქებებსა და სისხლიან დაპირისპირებებს სხვა ნარკობარონებთან. ამ ყველაფერთან ერთად, მან მცირე ხნით არჩეული პოლიტიკოსის როლში ყოფნაც მოასწრო.