სომხეთის პრემიერმინისტრმა ნიკოლ ფაშინიანმა რუსეთს, რომელიც სომხეთის რკინიგზებს მართავს, სთხოვა ნახიჩევანის აზერბაიჯანულ ექსკლავსა და თურქეთის საზღვართან მიმდებარე სარკინიგზო მონაკვეთების სრულად აღდგენა "სასწრაფოდ განიხილოს".

"მგონია, რომ უახლოეს მომავალში იგივე საკითხს იჯევან–ყაზახის მონაკვეთთან დაკავშირებითაც დავსვამ, რადგან ვფიქრობ, ამ მონაკვეთის რაც შეიძლება სწრაფად აღდგენის გადაუდებელი საჭიროებაც არსებობს", — განაცხადა ფაშინიანმა ხუთშაბათს გამართულ ბრიფინგზე.

მან ასევე გამოთქვა იმედი, რომ რუსეთი მის მოთხოვნას სწრაფად შეასრულებს.

ყველა აღნიშნული მონაკვეთი სომხეთის სამხრეთ ნაწილს, სადაც ე.წ. ტრამპის მარშრუტმა უნდა გაიაროს გამორიცხავს. თუმცა ამ მონაკვეთების გახსნა ფაშინიანის მთავრობის მიერ შემუშავებული "მშვიდობის გზაჯვარედინის" პროექტის ნაწილია.

საერთაშორისო მშვიდობისა და კეთილდღეობის ტრამპის მარშრუტი (Trump Route for International Peace and Prosperity — TRIPP), რომელიც უფრო უკეთ უბრალოდ ტრამპის მარშრუტის სახელით არის ცნობილი, აგვისტოში ვაშინგტონში გამართულ სამიტზე გამოცხადდა და მიზნად ისახავს სომხეთის ტერიტორიის გავლით, აზერბაიჯანის მის ექსკლავთან, ნახიჩევანთან დაკავშირებას.

ამ კვირის დასაწყისში რუსეთმა, რომელიც ვაშინგტონის სამიტზე მიღებული შეთანხმებების მიღმა დარჩა განაცხადა, რომ მზად არის სომხეთთან ერთად ტრამპის მარშრუტში შესაძლო მონაწილეობის საკითხი განიხილოს.

რუსეთის საგარეო საქმეთა სამინისტროს დსთ-ის ქვეყნების საკითხებზე პასუხისმგებელი მეოთხე დეპარტამენტის დირექტორის, მიხაილ კალუგინის თქმით, ამისთვის "საკმარისი საფუძვლები არსებობს".

კალუგინმა, სხვა საკითხებთან ერთად, ყურადღება გაამახვილა "სამხრეთ კავკასიის რკინიგზაზე", რომელიც რუსეთის სახელმწიფო კომპანია "რუსეთის რკინიგზების" შვილობილი საწარმოა და "ფლობს კონცესიას სომხეთის სარკინიგზო ქსელის მართვაზე".

2008 წელს 30-წლიანი კონცესიის ხელშეკრულება გაფორმდა, რომელიც სომხეთის სარკინიგზო სისტემის "რუსეთის რკინიგზის" მიერ დაარსებული "სამხრეთ კავკასიის რკინიგზისთვის" გადაცემას ითვალისწინებდა.

კალუგინმა ასევე აღნიშნა, რომ ტრამპის მარშრუტი სომხეთის სამხრეთ ნაწილზე გაივლის, სადაც სომხეთ–ირანის საზღვრის გასწვრივ რუსი მესაზღვრეები არიან განთავსებული.

ხუთშაბათს, ტრამპის მარშრუტში რუსეთის შესაძლო ჩართულობაზე საუბრისას, ფაშინიანმა განაცხადა, რომ პროექტი აშშ-სთან ორმხრივია და დასძინა, რომ "ნებისმიერი მესამე მხარის მონაწილეობა შეიძლება განიხილებოდეს მხოლოდ ორმხრივ ფორმატში".

ფაშინიანი ასევე გამოეხმაურა "სამხრეთ კავკასიის რკინიგზის" მიერ გამოთქმულ მზადყოფნას, რომ ადმინისტრაციიდან სომხეთს გადასცეს მხოლოდ მეგრის სარკინიგზო მონაკვეთი, სადაც, სავარაუდოდ, ტრამპის მარშრუტმა უნდა გაიაროს, და აღნიშნა, რომ ეს "გაუგებრობა" იყო.

"[მეგრის სარკინიგზო] მონაკვეთი არ არის რუსეთის მმართველობის ქვეშ, რომ სომხეთს გადმოეცეს. ეს სომხეთის სუვერენული ტერიტორიაა და ჩვენ ამ სუვერენული ტერიტორიის მართვა არავისთვის არ გადაგვიცია. იქ საერთოდ არ არსებობს სარკინიგზო ინფრასტრუქტურა, რომელიც ვინმეს უნდა ემართა", — განაცხადა ფაშინიანმა.

მიუხედავად იმისა, რომ ამ ეტაპზე არ არსებობს ინფორმაცია, როდის დაიწყებს ტრამპის მარშრუტი ფუნქციონირებას, ხუთშაბათს ვაშინგტონის სამიტის შედეგების მხარდასაჭერად შექმნილი სომხეთ–აშშ-ის ორმხრივი სამუშაო ჯგუფის პირველი შეხვედრა გაიმართა, — განაცხადა სომხეთის საგარეო საქმეთა სამინისტრომ.

დეკემბრის დასაწყისში ფაშინიანმა აღნიშნა, რომ კომპანია TRIPP, რომელიც სომხეთში დარეგისტრირდება, მიიღებს "უფლებას განავითაროს სარკინიგზო, საავტომობილო, ნავთობისა და გაზის მილსადენების, ასევე ბოჭკოვანი-ოპტიკური კომუნიკაციების საჭირო ინფრასტრუქტურა".

მან ასევე დაამატა, რომ TRIPP-ის განხორციელების ზოგად პირობებზე "ინტენსიური მოლაპარაკებები" მიმდინარეობს და რომ პროექტის რეალიზაციისა და მშენებლობის ეტაპი "შესაძლოა მომავალი წლიდან დაიწყოს".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.