ევროკავშირის ინსტიტუტების წარმომადგენლები მიგრანტების დაბრუნების ახალ წესებზე შეთანხმდნენ, რომლებიც დეპორტაციის პროცესის დაჩქარებასა და გამკაცრებას ითვალისწინებს. ამის შესახებ ინფორმაციას Politico ავრცელებს.

ახალი რეგულაციების თანახმად, ევროკავშირის წევრ ქვეყნებს შესაძლებლობა ექნებათ, ევროკავშირის ტერიტორიის დატოვების ვალდებულების მქონე პირები ე.წ. "დაბრუნების ცენტრებში" გაგზავნონ, რომლებიც ევროკავშირის ფარგლებს გარეთ იქნება განთავსებული.

ევროკომისარი მიგრაციის საკითხებში, მაგნუს ბრუნერი აცხადებს, რომ შეთანხმება ევროკავშირს მიგრაციის პროცესებზე უფრო ეფექტიანი კონტროლის საშუალებას მისცემს. მისი თქმით, ამჟამად უარყოფილი თავშესაფრის მაძიებლების მხოლოდ დაახლოებით 27% ტოვებს ევროკავშირის ტერიტორიას.

"ეს შეთანხმება ევროკავშირს დაეხმარება, დაიბრუნოს კონტროლი იმაზე, ვინ შემოდის ევროკავშირში და ვინ უნდა დატოვოს ის.

ხალხს უნდა დავუბრუნოთ განცდა, რომ ჩვენ ვაკონტროლებთ იმას, რაც ხდება", — აღნიშნა მან.

Politico-ს ცნობით, შეთანხმება ასევე ითვალისწინებს უფრო მკაცრ ზომებს იმ პირების მიმართ, რომლებიც უსაფრთხოების მიმართულებით საფრთხეს წარმოადგენენ. დოკუმენტში გათვალისწინებულია საცხოვრებელი სახლების შემოწმების შესაძლებლობა, ხანგრძლივი დაკავება, ევროკავშირში შესვლის აკრძალვა და სანქციები იმ პირებისთვის, რომლებიც დეპორტაციის პროცესში არ თანამშრომლობენ.

მოლაპარაკებებში მონაწილე ფრანგმა ევროპარლამენტარმა, ფრანსუა ქსავიე ბელამიმ განაცხადა, რომ ახალი წესები ევროკავშირის მიგრაციულ პოლიტიკაში გარდამტეხ ცვლილებას წარმოადგენს.

"წლების განმავლობაში ევროპა ყველაზე ცუდ სიგნალს აგზავნიდა — მაშინაც კი, თუ ქვეყანაში დარჩენის უფლება არ გქონდათ, დიდი შანსი იყო, არაფერი მომხდარიყო. ეს ეპოქა დასრულდა. თუ ევროპაში დარჩენის უფლება არ გაქვთ, მისი დატოვება მოგიწევთ", — თქვა ბელამიმ.

თუმცა შეთანხმებას მწვავე კრიტიკა მოჰყვა ადამიანის უფლებათა დამცველი ორგანიზაციებისა და ევროპარლამენტის მემარცხენე და მწვანე ჯგუფების მხრიდან.

ევროპარლამენტარმა, მელისა ქამარამ დოკუმენტს "ქსენოფობიური იდეოლოგიის სამსახურში ჩაყენებული სამართლებრივი არსენალი" უწოდა.

მისი თქმით, შეთანხმება ევროკავშირის გარეთ დაბრუნების ცენტრების შექმნას, არასრულწლოვანთა დაკავებასა და "აშშ-ის საიმიგრაციო სამსახურის (ICE) პრაქტიკებით შთაგონებულ სახლის შემოწმებებს" უშვებს.

კრიტიკულად აფასებს შეთანხმებას ასევე ლტოლვილთა უფლებების დამცველი ორგანიზაციაც. ორგანიზაციის ევროკავშირის ადვოკატირების დირექტორის, მარტა ველანდერის თქმით, ინიციატივა ევროკავშირის მიგრაციულ პოლიტიკაში "შემაშფოთებელი ახალი ეტაპია".

"ეს შეთანხმება მთავრობებს ადამიანების დაკავებისა და დეპორტაციის გაცილებით ფართო უფლებამოსილებას მისცემს. არსებობს საფრთხე, რომ ნორმად იქცეს საიმიგრაციო რეიდები, გაიზარდოს დაკავებების შემთხვევები ევროკავშირის ტერიტორიის გარეთ მდებარე, ციხის მსგავსი დაწესებულებებში და მოიმატოს იმ ადამიანების დეპორტაციის რისკმა, რომლებიც შესაძლოა დევნის, წამების ან კიდევ უფრო მძიმე საფრთხის წინაშე აღმოჩნდნენ", — განაცხადა ველანდერმა.

Politico-ს ინფორმაციით, შეთანხმების ძალაში შესასვლელად ევროკავშირის საბჭოს და ევროპარლამენტის მხარდაჭერა სჭირდება. ზოგიერთი დებულება ერთ წელიწადში ამოქმედდება, თუმცა ე.წ. "დაბრუნების ცენტრების" შექმნის შესაძლებლობა წევრი ქვეყნებისთვის დაუყოვნებლივ გახდება ხელმისაწვდომი.