სტატია შეიცავს სპოილერებს Euphoria-ს მესამე სეზონიდან.

სემ ლევინსონს ზენდეიას პერსონაჟისთვის, რუსთვის, სულ სხვაგვარი ფინალი ჰქონდა ჩაფიქრებული, თუმცა გეგმები მსახიობ ანგუს კლაუდის ტრაგიკულმა გარდაცვალებამ შეცვალა. კლაუდი, რომელიც პირველ ორ სეზონში ნარკოდილერ ფეზკოს როლს ასრულებდა, 2023 წელს, 25 წლის ასაკში, ფენტანილის ზედოზირებით გარდაიცვალა. სწორედ ამ პერიოდში მუშაობდა ლევინსონი მესამე, ფინალურ სეზონზე.

მესამე სეზონის ფინალურ სერიაში In God We Trust, რუ ბენეტი სწორედ ფენტანილით გაზავებული პერკოცეტით კვდება. ეს ყველაფერი კი ალამომ დაგეგმა, რადგან ეგონა, რომ რუ პოლიციასთან, კერძოდ კი ნარკოტიკებთან ბრძოლის სამმართველოსთან თანამშრომლობდა.

რეჟისორმა, რომელსაც თავად არასოდეს დაუმალავს, რომ წარსულში ნარკოდამოკიდებულებას ებრძოდა და ახლა რეაბილიტაციის გზაზეა, პოდკასტში ფენტანილის კრიზისზე ისაუბრა:

"ფენტანილის ასეთი ფართო გავრცელება ყოველთვის ძალიან მაშფოთებდა. ეს არის თემა, რომელსაც სერიალის სხვადასხვა სეზონში შევეხე. მაგრამ მას შემდეგ, რაც ანგუსი გარდაიცვალა, სცენარის ხელახლა გადააზრება მომიწია. მივხვდი, რომ დღეს შეუძლებელია დაწერო ამბავი დამოკიდებულებაზე იმ რეალური და სასტიკი შედეგების ჩვენების გარეშე, რომლებიც მას აუცილებლად მოჰყვება. ადამიანების უმრავლესობას მეორე შანსი უბრალოდ არ ეძლევა. ფენტანილს შეუძლია თვალის დახამხამებაში გამოგასალმოს სიცოცხლეს", — ამბობს სემ ლევისონი.

"იმ ამბის კონტექსტში, რომლის მოყოლაც თავიდანვე გვქონდა განზრახული და რომელიც დამოკიდებულებასა და მის შედეგებზე მოგვითხრობს, ეს ჩემთვის დასასრულს ჰგავს", — აღნიშნა სემ ლევინსონმა, — "Euphoria-ის ფინალი ტრაგიკულია, თუმცა ეს ყველაფერი რეალურია. თუ დღეს ნარკოტიკებს მოიხმარ, ძალიან დიდია შანსი, რომ ამან მოგკლას".

მაყურებელს დარტყმა იმანაც მიაყენა, რომ ამ სეზონში რუს დამოკიდებულება ყურადღების ცენტრში აღარ ყოფილა. ფსონები სიცოცხლესა და სიკვდილს შორის მას შემდეგ გაიზარდა, როდესაც სასკოლო დრამის სიუჟეტი დასრულდა.

"გვინდოდა, გაგვექარწყლებინა ილუზია, რომ თითქოს სიყვარული, ფული, დიდება და ნარკოტიკები გამოსავალია. ვიგრძენი, რომ თუ მართლაც რაღაც მნიშვნელოვნის თქმა გვინდოდა, მაყურებელი იმ ოჯახის წევრის პოზიციაში უნდა ჩაგვეყენებინა, რომელიც საყვარელ ადამიანს კარგავს", — განაცხადა რეჟისორმა, რითაც მიანიშნა სხვა მთავარი პერსონაჟების სიუჟეტურ ხაზებზე.

"დამოკიდებულების სხვადასხვა ფაზა არსებობს: ხანდახან ნივთიერებებს ყოველ წამს მოიხმარ, ხან კი გგონია, რომ ცხოვრება მეტ-ნაკლებად დაალაგე — შესაძლოა ცოტა მარიხუანა მოწიო, დალიო, მაგრამ ეს შენს მთავარ პრობლემად არ მიგაჩნდეს. თუმცა, მიდრეკილება ყოველთვის იქვეა", — განმარტა ლევინსონმა მესამე სეზონში რუს ნარკოდამოკიდებულებაზე საუბრისას.

მიუხედავად რუს ტრაგიკული სიკვდილისა, სემ ლევინსონი მიიჩნევს, რომ დასასრული პესიმისტური არ არის. მისი თქმით, მთავარი პერსონაჟის გარდაცვალების შემდეგ ალის პერსონაჟში დაგროვილი ბრაზი აბსოლუტურად ბუნებრივია, რადგან ბავშვებისთვის შხამის მიყიდვა ბოროტებაა. რეჟისორი თვლის, რომ ფინალი მაინც იმედისმომცემია.