საქართველოს ჟურნალისტური ეთიკის ქარტია აჭარის საზოგადოებრივი მაუწყებლიდან 14 თანამშრომლის გათავისუფლებას გამოეხმაურა. ორგანიზაცია მიმდინარე პროცესებს უსამართლოდ, დაუსაბუთებლად მიიჩნევს და მას კრიტიკული აზრის დევნას უკავშირებს.

ქარტია ხაზს უსვამს, რომ გათავისუფლებული მედიასპეციალისტები მაღალი პროფესიონალიზმითა და დამოუკიდებლობით გამოირჩევიან. ორგანიზაციის შეფასებით, ეს ნაბიჯი ემსახურება აჭარაში საინფორმაციო ველის საბოლოო "მოსუფთავებასა' და მაუწყებლის კრიტიკული აზრისგან დაცლას. თავად ჟურნალისტების ნაწილიც მიიჩნევს, რომ მათი დევნა განსხვავებული პოზიციის გამო ხდება.

"ჟურნალისტური ეთიკის ქარტია აჭარის საზოგადოებრივი მაუწყებლის გადაწყვეტილებას რეორგანიზაციის საბაბით ჟურნალისტების გათავისუფლების შესახებ უსამართლოდ და დაუსაბუთებლად მიიჩნევს.

2 ივნისს აჭარის საზოგადოებრივი მაუწყებლის 14 თანამშრომელს დირექციამ ელექტრონული ფოსტით შეატყობინა შრომითი ხელშეკრულების შეწყვეტის შესახებ. მათ შორის არიან გადაცემა "სათქმელის" წამყვანი ირინა ყურუა, რადიოს საინფორმაციო გამოშვების რედაქტორი მაია მერკვილაძე და ჟურნალისტები თეონა ხარაბაძე, ლევან ურიდია და სალომე გეგეშიძე.
აჭარის საზოგადოებრივი მაუწყებლის ახლად დანიშნულმა დირექტორმა ირაკლი კიკვაძემ გამოცემა "ბათუმელებთან" კომუნიკაციაში გათავისუფლებები მაუწყებელში მიმდინარე რეორგანიზაციას დაუკავშირა. მან განმარტა, რომ მის გუნდს ინფრასტრუქტურული გამოწვევებისა და სხვა მიზეზების გამო ბევრი გადაცემის გაუქმება მოუწია.

ქარტიას ეჭვებს უჩენს ის გარემოება, რომ გათავისუფლებული ჟურნალისტები დამოუკიდებლობის მაღალი ხარისხითა და პროფესიონალიზმით გამოირჩევიან და რომ ისინი ყოველთვის პატივისცემას იჩენენ განსხვავებული აზრის მიმართ და სვამენ კრიტიკულ შეკითხვებს. გათავისუფლებული ჟურნალისტების ნაწილი, ვისი პოზიციაც ამ დროისთვის ცნობილია, თავადაც ასე მიიჩნევს, რომ კრიტიკული აზრის გამო იდევნება. ეს ქარტიას აფიქრებინებს, რომ გათავისუფლებები სხვა არაფერია, თუ არა აჭარის საზოგადოებრივი მაუწყებლის კრიტიკული აზრისგან დაცლის მცდელობა და ეს შერჩევითი, მიკერძოებული დამოკიდებულება ჟურნალისტების მიმართ აჭარაში საინფორმაციო ველის საბოლოოდ მოსუფთავებას ემსახურებ", — წერია განცხადებაში.

განცხადებაში აღნიშნულია, რომ ნათია კაპანაძის იმპიჩმენტის შემდეგ, არხის სარედაქციო ხაზი რადიკალურად შეიცვალა და დაემორჩილა პარტიულ დღისწესრიგს. კრიტიკულად მოაზროვნე კადრებისგან ეტაპობრივი გათავისუფლების პროცესი კი, სავარაუდოდ, ახლა ბოლო ტალღას გადის.

ქარტია სრულ სოლიდარობას უცხადებს გათავისუფლებულ კოლეგებს და მაუწყებლის ხელმძღვანელობას მეტი გამჭვირვალობისა და სამართლიანობისკენ მოუწოდებს.

"კვლევები აჩვენებს, რომ მას შემდეგ რაც ნათია კაპანაძემ აჭარის მაუწყებელი იმპიჩმენტის შედეგად დატოვა, მაუწყებლის სარედაქციო პოლიტიკა რადიკალურად შეიცვალა და პარტიულ დღის წესრიგს დაემორჩილა. ტელევიზია სხვადასხვა ხელმძღვანელობის პირობებში ეტაპობრივად გათავისუფლდა კრიტიკულად მოაზროვნე ჟურნალისტებისგან. ახლა, სავარაუდოდ, ამ სისტემური პროცესის ბოლო ტალღის მოწმე ვხდებით.

ქარტია სოლიდარობას უცხადებს აჭარის საზოგადოებრივი მაუწყებლიდან გათავისუფლებულ კოლეგებს და მაუწყებლის მენეჯმენტს სამართლიანობისკენ, რეორგანიზაციის პროცესში კი გათავისუფლებებთან დაკავშირებით მეტი გამჭვირვალობისა და სიცხადისკენ მოუწოდებს", — აღნიშნულია ქარტიის განცხადებაში.

შეგახსენებთ, საზოგადოებრივი მაუწყებლის აჭარის ტელევიზიისა და რადიოს მედიაწარმოებისა და საინფორმაციო სამსახურის 14 თანამშრომელი სამსახურიდან გაათავისუფლეს. აღნიშნული ინფორმაცია "მედიაჩეკერს" არხის დირექტორმა, ირაკლი კიკვაძემ დაუდასტურა.

მანამდე, ცნობილი გახდა, რომ "აჭარის ტელევიზიიდან" 5 თანამშრომელი — ირინა ყურუა, მაია მერკვილაძე, თეონა ხარაბაძე, ლევან ურიდია და სალომე გეგეშიძე გაათავისუფლეს.