საქართველოს ახალგაზრდა იურისტთა ასოციაციამ დიმიტრი ჯამბურიას სახელით ადამიანის უფლებათა ევროპულ სასამართლოში საჩივარი გაგზავნა. ამის შესახებ განცხადებას ორგანიზაცია სოციალურ ქსელში ავრცელებს.

საიას განცხადებით, საქმე პარლამენტის შენობის წინ, ტროტუარზე მშვიდობიანი პროტესტის გამო პირის ადმინისტრაციულ სამართალდამრღვევად ცნობასა და მისთვის ადმინისტრაციული პატიმრობის შეფარდებას ეხება.

საიას ინფორმაციით, საჩივარში ადამიანის უფლებათა ევროპული კონვენციით დაცული რამდენიმე უფლების დარღვევაზეა გამახვილებული ყურადღება. კერძოდ, ორგანიზაცია დავობს შეკრებისა და გაერთიანების თავისუფლების, საქმის სამართლიანი განხილვის უფლების, უფლებათა ბოროტად გამოყენების აკრძალვისა და დისკრიმინაციის აკრძალვის დარღვევაზე.

"საიამ დიმიტრი ჯამბურიას სახელით ადამიანის უფლებათა ევროპულ სასამართლოში საჩივარი გაგზავნა.

საქმე ეხება პარლამენტის წინ, ტროტუარზე მშვიდობიანი პროტესტის გამო პირის ადმინისტრაციულ სამართალდამრღვევად ცნობას და მისთვის პატიმრობის შეფარდებას.
საია დავობს ადამიანის უფლებათა ევროპული კონვენციით დაცული შემდეგი უფლებების დარღვევაზე:

შეკრებისა და გაერთიანების თავისუფლება;
საქმის სამართლიანი განხილვის უფლება;
უფლებათა ბოროტად გამოყენების აკრძალვა;
დისკრიმინაციის აკრძალვა საქმის სამართლიანი განხილვის უფლებასთან და შეკრებისა და გაერთიანების თავისუფლებასთან ერთად.

2024 წლის დეკემბრიდან დღემდე, ქართულმა ოცნებამ მიზანმიმართულად მიიღო კანონები, რომლებსაც შსს და სასამართლო ექსკლუზიურად პროევროპული აქციების მონაწილეების დასასჯელად იყენებს. ტროტუარზე დგომისთვის მოქალაქეებს ფაქტობრივად ყოველდღიურად უფარდებენ ადმინისტრაციულ პატიმრობას, რაც ნათლად ადასტურებს, რომ მომჩივნის საქმე არა რიგითი სამართალწარმოებაა, არამედ პროევროპული აქციების მონაწილეების წინააღმდეგ მიმართული ფართომასშტაბიანი და სისტემური დისკრიმინაციის ნაწილია", — წერია განცხადებაში.

ცნობისთვის, ტროტუარზე დგომის გამო დიმიტრი ჯამბურიას სასამართლომ 4-დღიანი პატიმრობა შეუფარდა.