ნეტფლიქსი სულ მალე კიდევ ერთი მსოფლიო ბესტსელერის ეკრანიზაციას შემოგვთავაზებს. წარმატებული სარეჟისორო დებიუტის შემდეგ, მსახიობი და მომღერალი ანა კენდრიკი ეველინ ჰიუგოს შვიდი ქმრის გადასაღებად ემზადება. ტეილორ ჯენკინს რიდის ეს გახმაურებული რომანი 2017 წელს გამოიცა, მაგრამ განსაკუთრებული პოპულარობა რამდენიმე წლის შემდეგ, ტიკტოკის წყალობით მოიპოვა. აღსანიშნავია, რომ კინოადაპტაციის აღმასრულებელი პროდიუსერი თავად მწერალი იქნება.

ეველინ ჰიუგოს შვიდი ქმარი გვიყვება ჰოლივუდის ოქროს ხანის გამოგონილ ვარსკვლავზე, რომელთანაც ბოლო ინტერვიუს ჩამოსართმევად არცთუ ცნობილი ჟურნალისტი მიდის. ეველინ ჰიუგოს მონათხრობი თავის თავბრუდამხვევ კარიერასა და კინოზე არანაკლებ დრამატულ პირად ცხოვრებაზე, რომელიც ინტერვიუს ნაცვლად ბიოგრაფიას ედება საფუძვლად, ბევრ მოულოდნელ საიდუმლოს ააშკარავებს. რომანი მსოფლიოში 24 მილიონზე მეტ ეგზემპლარად გაიყიდა და ითარგმნა 43 ენაზე, მათ შორის, ქართულად (სალომე ჩიტაძის თარგმანი, გამომცემლობა პალიტრა L).

კინოადაპტაციისთვის სცენარი ლიზ ტაიგელარმა დაწერა, რომელსაც აქამდე ისეთ წარმატებულ ეკრანიზაციაზე უმუშავია, როგორიცაა Hulu-ის პოპულარული მინისერიალი ყველგან ხანძრის კერებია. ჯერჯერობით უცნობია, ვინ ითამაშებს ფილმში, თუმცა, ჯენკინს რიდის ფანები უკვე წლებია, სხვადასხვა მსახიობს განიხილავენ ამა თუ იმ პერსონაჟის როლზე. პოპულარულ ვერსიებს შორისაა ანა დე არმასი და ჯესიკა ჩესტეინი.

თავად ტეილორ ჯენკინს რიდს კი ეველინ ჰიუგოზე არანაკლები ვარსკვლავური ცხოვრება აქვს. მწერლის წიგნები მთელ მსოფლიოში უსაზღვრო პოპულარობით სარგებლობს, რაც კვლავაც ტიკტოკის დამსახურებაა. პლატფორმაზე მწერლის სახელის ჰეშტეგით დადებულ ვიდეოებს ჯამში 783 მილიონზე მეტი ნახვა აქვს.

2023 წელს რიზ უიზერსპუნის პროდიუსერობით გამოვიდა მინისერიალი დეიზი ჯოუნსი და ექვსეული, რომელიც ჯენკინს რიდის ამავე სახელწოდების რომანს ეფუძნება და გვიყვება 1970-იანების გამოგონილ როკჯგუფზე. ეს წიგნიც ასევე თარგმნილია ქართულად.

ასევე იხილეთ:

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...