სომხეთის ეკონომიკის სამინისტრომ მთავრობას წარუდგინა პროგრამა, რომელიც ადგილობრივი კომპანიების მიერ პროდუქციის ევროკავშირის ბაზარზე ექსპორტის ხელშეწყობას ისახავს მიზნად. ამის შესახებ, Armenpress-ის ცნობით, ჟურნალისტებთან საუბრისას სომხეთის ეკონომიკის მინისტრმა, გევორგ პაპოიანმა განაცხადა.

მთავრობამ გადაწყვეტილება რუსეთის მიერ სომხური საქონლის იმპორტის შეზღუდვების ფონზე მიიღო.

მინისტრის განმარტებით, სომხური სოფლის მეურნეობის პროდუქტებს ევროკავშირის ბაზარზე გასვლის რეალური შესაძლებლობა აქვთ, რადგან ექსპორტზე ორიენტირებული ხილი და ბოსტნეული ფლობს Global GAP-ის სერტიფიკატს, რომელიც საერთაშორისო სტანდარტების ერთ-ერთ უმაღლეს ნიშნად ითვლება.

მისი თქმით, მთავარი გამოწვევა ლოჯისტიკური ხარჯებია.

პაპოიანმა მაგალითად მარწყვის წარმოება მოიყვანა და აღნიშნა, რომ ევროპელ ფერმერებთან შედარებით სომეხ მწარმოებლებს გაცილებით მაღალი სატრანსპორტო ხარჯების გაწევა უწევთ, რასაც დამატებით ევროკავშირის საბაჟო მოსაკრებლები ემატება.

"ჩვენი პროდუქცია აკმაყოფილებს როგორც ევრაზიული ეკონომიკური კავშირის, ისე ევროკავშირის უმაღლეს სტანდარტებს. ახლა მთავარ პრობლემად ტრანსპორტირება რჩება, რის გამოც ექსპორტიორების მხარდაჭერის პროგრამა შევიმუშავეთ", — განაცხადა მინისტრმა.

მისი თქმით, სახელმწიფო სოფლის მეურნეობის პროდუქციის ექსპორტიორებს მნიშვნელოვან ფინანსურ დახმარებას გაუწევს. პროგრამის ფარგლებში, წლის ბოლომდე ყვავილების ექსპორტისთვის დაახლოებით 5,5 მილიონი დოლარის, ხოლო პომიდვრისა და წიწაკის ექსპორტისთვის — თითოეულ შემთხვევაში 3,5 მილიონი დოლარის კომპენსაციაა გათვალისწინებული.

პაპოიანის განცხადებით, სომხურ კომპანიებს პროდუქციის ექსპორტი ევროკავშირის ყველა ქვეყანაში შეეძლებათ — საბერძნეთიდან გერმანიამდე.

ამასთან, მინისტრმა აღნიშნა, რომ სომხეთისა და რუსეთის წარმომადგენლებს შორის მოლაპარაკებები უკვე მიმდინარეობს. მისი თქმით, მხარეები პრობლემების მოგვარებით არიან დაინტერესებული და არსებული სავაჭრო შეზღუდვების საკითხი უახლოეს პერიოდში შეიძლება გადაიჭრას.