სანქცირებული შს მინისტრის მოადგილის, ალექსანდრე დარახველიძის თქმით, თუ 16-დან 18 წლამდე ბავშვს ექნება წიწაკის სპრეი, მასზე გავრცელდება შესაბამისი რეგულაციები, 16 წლის ქვემოთ ბავშვის შემთხვევაში მოიძიებენ, ვინ გაყიდა ეს საშუალება და მას დააკისრებენ პასუხისმგებლობას.

"რაც შეეხება იმას, 18 წლის ასაკს ქვემოთ თუ მოხვდება წიწაკის სპრეი ბავშვის ხელში, მოგეხსენებათ, ჩვენთან ადმინისტრაციული პასუხისმგებლობა 16 წლის ასაკიდან იწყება, შესაბამისად, თუ 16 წლის ზევით, 18 წლამდე ექნება ბავშვს ეს საშუალება, მის მიმართ გავრცელდება ის რეგულაციები, რაც გათვალისწინებულია წიწაკის სპრეის ქონასა და ტარებაზე, თუ უნებართვოდ იქნება ეს და შესაბამისი სანქციები გატარდება. 16 წლის ქვემოთ, ამ შემთხვევაში ჩვენ მოვიძიებთ, ვინ გაყიდა ეს საშუალება და იურიდიული პირი იქნება თუ ფიზიკური, მას დაეკისრება პასუხისმგებლობა, იმიტომ, რომ არ ჰქონდა უფლება მიეყიდა 18 წელს მიუღწეველი პირისთვის წიწაკის სპრეი. ასევე, მშობლის პასუხისმგებლობის საკითხთან დაკავშირებით, ჩვენ ამ შემთხვევაში არ გვაქვს აქ ჩადებული, ამ ნაწილში შეგვილია ვიფიქროთ, რომ მშობლის მიმართებითაც დაწესდეს პასუხისმგებლობა",— განაცხადა დარახველიძემ.

შეგახსენებთ, რომ შსს-მ შეიმუშავა საკანონმდებლო ცვლილებები წიწაკის სპრეის, აკუსტიკური იარაღისა და ელექტროშოკური მოწყობილობების ტარების წესებთან დაკავშირებით. ცვლილებების მიხედვით, რომელიც უკვე პარლამენტშია განსახილველად, წიწაკის სპრეის, ელექტროშოკის და აკუსტიკური იარაღის შეძენა მხოლოდ შსს-ს ნებართვით იქნება შესაძლებელი.