გერმანიის გაერთიანების დღესთან დაკავშირებით, საქართველოში გერმანიის ფედერაციული რესპუბლიკის ელჩს, პეტერ ფიშერს, ახალგაზრდული ორგანიზაციების წარმომადგენლებმა გერმანიის პრეზიდენტის, ფრანკ-ვალტერ შტაინმაიერის სახელზე მისალოცი წერილი გადასცეს. როგორც ორგანიზაციების მიერ გავრცელებულ ინფორმაციაში წერია, ქართველმა ახალგაზრდებმა ამ ნაბიჯით გამოხატეს მადლიერება და პატივისცემა გერმანიისა და გერმანელი ხალხის მიმართ.

"ამ ნაბიჯით, ქართველმა ახალგაზრდებმა გამოხატეს პატივისცემა და მადლიერება გერმანიის სახელმწიფოსა და ხალხის მიმართ, საქართველოსათვის გაწეული მრავალწლიანი, უაღრესად მნიშვნელოვანი მხარდაჭერისათვის. მათ შორის, საქართველოს ევროპული მისწრაფებებისადმი მხარდაჭერისთვის. ასევე, ახალგაზრდები გამოხატავენ მზაობას, შესაძლებლობების ფარგლებში, ხელი შეუწყონ ქართულ-გერმანული ურთიერთობების განმტკიცებას.

ღონისძიება "ახალგაზრდობის თანხმობის აქტის" საინიციატივო ჯგუფის ორგანიზებითა და სხვადასხვა ახალგაზრდული ორგანიზაციის წარმომადგენელთა მონაწილეობით გაიმართა თბილისში, ევროპის მოედანზე, ბერლინის კედლის ფრაგმენტის წინ", — წერია გავრცელებულ ინფორმაციაში.

ცნობისთვის, მანამდე საქართველოში გერმანიის ელჩის, პეტერ ფიშერის მიმართ ქართული ოცნების წარმომადგენლები უხეშ განცხადებებს აკეთებდნენ, რასაც საერთაშორისო რეაგირება და გერმანიის ელჩის მხარდამჭერი განცხადებებიც მოჰყვა.

ამას გარდა, 28 სექტემბერს "ქართულ-გერმანული მეგობრობის" მარში გაიმართა, სადაც მოქალაქეებმა გერმანიას, გერმანელ ხალხს და პეტერ ფიშერს მადლობა გადაუხადეს მხარდაჭერისთვის და პატივისცემა დაუდასტურეს.