გერმანიის ელჩი, პეტერ ფიშერი საგარეო საქმეთა სამინისტროში დაიბარეს — ის უწყებაში უკვე მივიდა. მან სამინისტროში შესვლამდე კომენტარი გააკეთა და ანიშნა, რომ ეს გერმანიასთან თანამედროვე საქართველოს ურთიერთობის ისტორიაში პირველი შემთხვევაა, როდესაც გერმანელი ელჩი სამინისტროში დაიბარეს.

ფიშერის თქმით, ეს ნაბიჯი დიპლომატიური სანქციის ფორმაა.

"მე ვარ დაბარებული საგარეო საქმეთა სამინისტროს მიერ. დაბარება არის დიპლომატიური სანქციის ფორმა. გულწრფელად რომ გითხრათ, ეს ძალიან უჩვეულოა. ეს არის გერმანიასთან თანამედროვე საქართველოს ურთიერთობის ისტორიაში პირველი შემთხვევა, როცა გერმანელი ელჩი სამინისტროში დაიბარეს.

შევალ და მოვისმენ რას მეტყვიან. მაგრამ ასევე, მკაცრად უარვყოფ უსაფუძვლო და პროვოკაციულ ბრალდებებს, რომლებიც გერმანიის ფედერალური რესპუბლიკის, ჩემი და სხვა ელჩების წინააღმდეგ არის გამოთქმული.

ასევე გავაკრიტიკებ საქართველოს მთავრობის ამჟამინდელ კურსს, რომელიც წინააღმდეგობაშია ევროკავშირში გაწევრიანებასთან", — განაცხადა ფიშერმა, რომლის თარგმანსაც "ტვ პირველი" ავრცელებს.

პეტერ ფიშერის საგარეო საქმეთა სამინისტროში დაბარებაზე კომენტარი გააკეთა ოცნების პრემიერმინისტრმა ირაკლი კომახიძემ. მისი თქმით, ეს არის დიპლომატიური ღონისძიება, ზომა, როდესაც ელჩი საქართველოში მოქმედი ელჩი, არღვევს უხეშად ვენის კონვენციის პრინციპებს, ასე ხდება ხოლმე მისი დაბარება.

"რაც შეეხება [საგარეო უწყებაში მის] დაბარებას, ეს არის დიპლომატიური ღონისძიება, ზომა, როდესაც ელჩი საქართველოში მოქმედი ელჩი, არღვევს უხეშად ვენის კონვენციის პრინციპებს, ასე ხდება ხოლმე მისი დაბარება. ეს არის დიპლომატიური ზომა. თუ მოუნდება საგარეო საქმეთა სამინისტროს გააკეთებს კომენტარს. შემიძლია შეგახსენოთ, რომ ბატონი ფიშერი პირდაპირ არის ჩართული რადიკალური ოპოზიციის აქტივობებში, პირდაპირ ცდილობს ზეწოლა მოახდინოს დამოუკიდებელ მართლმსაჯულებაზე და ა.შ.", — აცხადებს კობახიძე.