ქართული ოცნების დეპუტატის, ირაკლი ზარქუას განცხადებით პარტიამ "შეიძლება დააყენოს საკითხი" და გერმანიის ელჩი საქართველოში, პეტერ ფიშერი "გააძევონ". შემდეგ ოცნების დეპუტატმა გერმანელ ელჩს "ჩვეულებრივი რადიკალი" უწოდა და დასძინა, რომ "ქართველმა ხალხმა გარკვევით თქვა, რომ ომი არ უნდა, მშვიდობა არჩია, ეროვნული ღირებულებები დაიცვა".

"ხოშტარიამ შიმშილობა კი შეწყვიტა და იმედია, გედიმაც, მაგრამ გერმანიის ელჩი ფიშერი ხომ არ ჩაენაცვლათ, იმდენად აქცენტირებულია და ყველაფერს ხაზი გადაუსვა, რაც კი დიპლომატიური ვალდებულება, პასუხისმგებლობა არსებობს. ტიპი, ჩვეულებრივი რადიკალი გახდა. ასეთ მოცემულობაში, შეიძლება, საკითხი დავაყენო, რომ ეს ელჩი გაძევებული იყოს, რადგან ქართველ და გერმანელ ხალხებს შორის ურთიერთობის გაჯანსაღებას კი არ ემსახურება, არამედ ქვეყნების დაპირისპირებას. ამის საფუძველი რა არის, გაგვაგებინოს, რატომ უნდა, რომ აგენტურა დასვას? იმიტომ, რომ სახელმწიფო ინტერესები დავიცავით? — ქართველმა ხალხმა გარკვევით თქვა, რომ ომი არ უნდა, მშვიდობა არჩია, ეროვნული ღირებულებები დაიცვა. ფიშერის პარტიის წარმომადგენელი გერმანიაში ჩამოაგდეს, შოლცი აღარ არის, მისი დანიშნულია და მაინც მავნებლობას აგრძელებს. ეს ჩემი სუბიექტური აზრია — ელჩები, ვინც მავნებლობენ, რადიკალებს ენაცვლებიან და სახელმწიფოს წინააღმდეგ მოქმედებენ, მგონია, რომ უნდა გავაძევოთ," — თქვა ზარქუამ.

შეგახსენებთ, გუშინ, კოალიცია ცვლილებისთვის ერთ-ერთმა ლიდერმა, ელენე ხოშტარიამ შიმშილობა შეწყვიტა — ეს ოპოზიციონერი პოლიტიკოსის პარლამენტთან შიმშილობის მე-4 დღე იყო. ოპოზიციონერი პოლიტიკოსის ამ გადაწყვეტილებას წინ უძღოდა 8 ოპოზიციური პარტიის ერთობლივი განცხადება, რომლითაც მათ უარი თქვეს თვითმმართველობის არჩევნებში მონაწილეობაზე.