სურსათის ეროვნული სააგენტო სასწავლო პროცესის დაწყებამდე საბავშვო ბაგა-ბაღების კვების ბლოკებისა და სამზარეულოების მდგომარეობას ამოწმებს.

როგორც უწყება იტყობინება, წელს, ქვეყნის მასშტაბით 1645 საჯარო და 241 კერძო საბავშვო ბაღის შემოწმებას გეგმავს.

"როგორ ხვდებიან სკოლამდელი დაწესებულებები ახალ სასწავლო წელს და რამდენად უსაფრთხოა ბავშვებისათვის ის გარემო, სადაც მათთვის საკვები მზადდება - სააგენტოს თბილისის დეპარტამენტის ინსპექტორები თბილისის საბავშვო ბაგა-ბაღების მართვის სააგენტოს წარმომადგენლებთან ერთად ვითარებას დეტალურად ეცნობიან და რეკომენდაციებს გასცემენ.

ზოგადი ჰიგიენა, მოწესრიგებული ინფრასტრუქტურა, ინვენტარი და აღჭურვილობა, სათანადო ტემპერატურული რეჟიმი, უვნებელი სასმელი წყალი, პერსონალის მზადყოფნა ის აუცილებელი პირობებია, რომლებიც საბავშვო ბაღების კვების ბლოკებმა უნდა დააკმაყოფილოს", — იტყობინება სეს-ი.

ცნობისთვის, საქსტატის მონაცემებით, საქართველოს მასშტაბით 1717 საჯარო სკოლამდელი აღზრდის დაწესებულება ფუნქციონირებს. მათ შორის თბილისში - 190.