ოცნების პრემიერი ირაკლი კობახიძე საქართველოში გერმანიის ელჩის, პეტერ ფიშერის საგარეო უწყებაში დაბარებას ჟურნალისტებთან საუბრისას გამოეხმაურა. მისი თქმით, ეს არის დიპლომატიური ღონისძიება, ზომა, როდესაც ელჩი საქართველოში მოქმედი ელჩი, არღვევს უხეშად ვენის კონვენციის პრინციპებს, ასე ხდება ხოლმე მისი დაბარება

"მე მგონია სრულიად ზედმეტია ბატონ ფიშერზე კომენტარების გაკეთება. მას ამოეწურება საკუთარი, როცა იქნება საკუთარი უფლებამოსილების ვადა, და დატოვებს ქვეყანას. აბსოლუტურად ზედმეტი მგონია ამ კაცზე კომენტარის გაკეთება", — ამბობს "ოცნების" პრემიერი ირაკლი კობახიძე საქართველოში გერმანიის ელჩ პეტერ ფიშერზე.

ჟურნალისტის კითხვაზე, მის გაძევებას ხომ არ აპირებენ?, კობახიძე პასუხობს — "რა თქმა უნდა არა".

"რაც შეეხება [საგარეო უწყებაში მის] დაბარებას, ეს არის დიპლომატიური ღონისძიება, ზომა, როდესაც ელჩი საქართველოში მოქმედი ელჩი, არღვევს უხეშად ვენის კონვენციის პრინციპებს, ასე ხდება ხოლმე მისი დაბარება. ეს არის დიპლომატიური ზომა. თუ მოუნდება საგარეო საქმეთა სამინისტროს გააკეთებს კომენტარს. შემიძლია შეგახსენოთ, რომ ბატონი ფიშერი პირდაპირ არის ჩართული რადიკალური ოპოზიციის აქტივობებში, პირდაპირ ცდილობს ზეწოლა მოახდინოს დამოუკიდებელ მართლმსაჯულებაზე და ა.შ.", — აცხადებს კობახიძე.

შეგახსენებთ, რომ ამ წუთებში პეტერ ფიშერი საგარეო უწყებაში იმყოფება. როგორც მან სამინისტროში შესვლამდე განაცხადა, ეს არის გერმანიასთან თანამედროვე საქართველოს ურთიერთობის ისტორიაში პირველი შემთხვევა და "დაბარება დიპლომატიური სანქციის ფორმაა".

"მე ვარ დაბარებული საგარეო საქმეთა სამინისტროს მიერ. დაბარება არის დიპლომატიური სანქციის ფორმა. გულწრფელად რომ გითხრათ, ეს ძალიან უჩვეულოა. ეს არის გერმანიასთან თანამედროვე საქართველოს ურთიერთობის ისტორიაში პირველი შემთხვევა, როცა გერმანელი ელჩი სამინისტროში დაიბარეს.

შევალ და მოვისმენ რას მეტყვიან. მაგრამ ასევე, მკაცრად უარვყოფ უსაფუძვლო და პროვოკაციულ ბრალდებებს, რომლებიც გერმანიის ფედერალური რესპუბლიკის, ჩემი და სხვა ელჩების წინააღმდეგ არის გამოთქმული.

ასევე გავაკრიტიკებ საქართველოს მთავრობის ამჟამინდელ კურსს, რომელიც წინააღმდეგობაშია ევროკავშირში გაწევრიანებასთან", — განაცხადა ფიშერმა, რომლის თარგმანსაც "ტვ პირველი" ავრცელებს.