ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, კაია კალასმა, დანიაში, სადაც ევროკავშირის საგარეო და თავდაცვის მინისტრების არაფორმალური შეხვედრები იმართება უკრაინის უსაფრთხოების საკითხთან დაკავშირებით ჟურნალისტებთან ისაუბრა. მისი თქმით, ევროპამ რუსეთზე ზეწოლა უნდა გააძლიეროს.

"ჩვენ გუშინ ვიხილეთ კიევზე მიტანილი ფართომასშტაბიანი იერიშები, ასევე ევროპული დელეგაციის შენობასაც დაარტყეს. საბედნიეროდ, ფიზიკურად არავინ დაშავებულა. ეს თავდასხმები აჩვენებს, რომ პუტინი ნებისმიერ სამშვიდობო მცდელობას დასცინის.

ამრიგად, რაც ჩვენ უნდა გავაკეთოთ, არის ზეწოლის გაზრდა. ეს არის, რაც მათ მართლა ესმით — ზეწოლა.

ცხადია, რომ ჩვენ გვაქვს სხვადასხვა შესაძლებლობების სფერო, სადაც მეტი უნდა გავაკეთოთ. მოველი, რომ წევრი სახელმწიფოები ამ შესაძლებლობების სფეროებში ლიდერობას აიღებენ. ამიტომ, ჩვენ ძალიან კონკრეტული ნაბიჯები უნდა გადავდგათ კონკრეტული პროექტების განსახორციელებლად", — განაცხადა კალასმა.

ცნობისთვის, რუსეთის მიერ უკრაინაზე ბოლო თავდასხმა 28 აგვისტოს ღამით დაიწყო. ოკუპანტებმა კიევს დრონებითა და რაკეტებით შეუტიეს. რუსეთმა 629 საჰაერო თავდასხმის ობიექტი გამოიყენა.