თბილისში, ელბაქიძის აღმართზე ბიზნესმენ გიორგი რამიშვილის სს "სილქნეტი" 7 შენობისგან შემდგარი მრავალფუნქციური კომპლექსის მშენებლობას გეგმავს. ამის შესახებ commersan.ge წერს.

კომპანია შეცვლილ პროექტს და ვიზუალს არქიტექტურის სამსახურთან უკვე ათანხმებს და შუალედური დასკვნაც მიღებული აქვს. პროექტის მიხედვით, მიწის ნაკვეთის ფართობი 22908 მ2-ია, საერთო ფართობი 47415.3 მ2, ხოლო საცხოვრებელი ფართობი 23652.7 მ2.

პროექტის მიხედვით ყველაზე მაღალი შენობა 31 სართულს მოიცავს. განმარტებითი ბარათის მიხედვით, პროექტის მიზანს წარმოადგენს შექმნას თანამედროვე საცხოვრებელი კომპლექსი, რომელიც იქნება დატვირთული ყველა იმ ფუნქციით რაც სჭირდება დამოუკიდებელ და სრულყოფილ განაშენიანებას.

"საპროექტო ტერიტორია მდებარეობს ქ. თბილისი, ზვიად გამსახურდიას სანაპირო #12; ქ.თბილისი, ქუჩა საქანელა, მიმდებარედ ნაკვეთი 03/042 და ხასიათდება ქანობიანი რელიეფით (ზღვის დონიდან მაქს. 413.84 და მინ. 392.85).

პროექტის მიზანს წარმოადგენს შექმნას თანამედროვე საცხოვრებელი კომპლექსი, რომელიც იქნება დატვირთული ყველა იმ ფუნქციით რაც სჭირდება დამოუკიდებელ და სრულყოფილ განაშენიანებას".

"სილქნეტის" თავმჯდომარე/წევრი: გიორგი რამიშვილია, თავმჯდომარის მოადგილე/წევრი: ვასილ კენკიშვილი, წევრი კი ალექსი თოფურია, მამუკა შურღაია, დევიდ ფრანც ბორგერი, სტელა ჰანდლერი, კარლ ერიკ მარტინ როოსი, იულია ბოილი. კომპანიის გენერალური დირექტორი დავით მამულაიშვილია.

პროექტის შესახებ სრულად წაიკითხეთ აქ.

შეგახსენებთ, რომ "სილქ როუდ ჯგუფის", "სილქნეტის" და Euronews Georgia-ს დამფუძნებელი გიორგი რამიშვილი ("ზარალა") 6 ივლისს დააკავეს.

შსს-ს ცნობით, გიორგი რამიშვილი სისხლის სამართლის კოდექსის 236-ე მუხლის მე-3 მე-4 ნაწილით დააკავეს, რაც ცეცხლსასროლი იარაღის მართლსაწინააღმდეგო შეძენა, შენახვა, ტარებას გულისხმობს. გავრცელებული ინფორმაციით, ის თბილისის საერთაშორისო აეროპორტში დააკავეს.

7 ივლისს მას 70 000-ლარიანი გირაო შეუფარდა და სასამართლო დარბაზიდან გაათავისუფლეს.

ბრალდებულმა სასამართლოზე განაცხადა, რომ "იარაღი ჩანთაში იდო და უბრალოდ ვერ შეამჩნია". მისი თქმით, "ეს უნებლიე შემთხვევა იყო და დანაშაულის ჩადენის განზრახვა არ ჰქონია".

"მინდა მკაფიოდ აღვნიშნო, რომ ეს არის შეცდომა, მე რომ ეს მცოდნოდა არ წამოვიღებდი იარაღს. მივფრინავდი, იარაღი ჩანთაში იდო და უბრალოდ ვერ შევამჩნიე და აქედან გამომდინარე ეს კვალიფიკაცია, რომ ვატარებდი იარაღს — არაა სწორი, უბრალოდ ჩანთაში იდო და ეგრევე წავედი.

რა თქმა უნდა, მე ამით არ ვამაყობ, მაგრამ მე მიმაჩნია, რომ ასეთი სახის შეცდომები გაყვანილი იყოს ისეთ რანგში, როგორც პროკურორი ითხოვს მგონია, რომ ეს ზედმეტია.

ძალიან ვნანობ, ეს ძალიან დიდი მაგალითი იქნება ჩემთვის. რაც შეეხება ადმინისტრაციულ ჯარიმებს, საერთოდ არ დამირღვევია კანონი და ყველა ჩემს მანქანას მძღოლი მართავს და ამიტომ ამ ნაწილში ვერ დავეთანხმები, რომ მე ვარ არაკანონმორჩილი ადამიანი, რომ მე რამე კანონი დამერღვიოს ამდენი წლის განმავლობაში. ეს არის ჩემი კომენტარი და ეს შეცდომა მოხდა და ეს შეიძლება ნებისმიერ აქ მჯდომ ადამიანს მოუვიდეს. ეს არ იყო გამიზნული და იარაღის ქონის უფლება ყველას აქვს და თუ შემთხვევით ჩანთაში ვერ აღმოაჩინე და პირდაპირ აეროპორტში მიხვედი და გაატარე, იქ სადაც ჩანს, არ შეიძლება, რომ ეს ადეკვატურმა ადამიანმა გააკეთოს.

კიდევ ერთხელ ვამბობ, რომ ეს არის ძალიან დიდი შეცდომა, მაგრამ ამას დანაშაულს მე ვერ ვუწოდებ. ბოდიში გრძელი სიტყვისთვის, მაგრამ მე ასე შევაფასებ ამ ფაქტს. ამიტომ ვითხოვ გირაოს, რაც შეეხება გაქცევას და მიმალვას — რა მჭირს მე გასაქცევი. ძალიან ბევრი საქმე და 7000 თანამშრომელი მყავს", — განაცხადა გიორგი რამიშვილმა სასამართლო პროცესზე (სტილი დაცულია).