ევროპული საქართველოს ინფორმაციით, 22 სექტემბრის საღამოს, ხობის რაიონის სოფელ ზემო ქვალონში, ევროპული საქართველოს მაჟორიტარობის კანდიდატ ნინო ჭანტურიასა და მამამისს, ჯემალ ჭანტურიას თავს დაესხნენ უცნობი პირები.

როგორც პარტია აცხადებს, თავდამსხმელებმა ორივე მათგანს ფიზიკური და სიტყვიერი შეურაცხყოფა მიაყენეს, მოსთხოვეს კამპანიის შეწყვეტა, წინააღმდეგ შემთხვევაში კი დამატებითი ძალადობით დაემუქრნენ.

ევროპული საქართველოს ცნობით, სოფელ ქვალონში ჩამოხეულია ევროპული საქართველოს ყველა პლაკატი.

"ამ ტიპის ძალადობა შედეგია ხელისუფლების მრავალწლიანი პრაქტიკის, როცა მოძალადეებს დასჯის მაგივრად ახალისებენ, ხოლო პოლიტიკურ ოპონენტებს ფიზიკურად უსწორდებიან. ევროპული საქართველო მიმართავს ყველა საერთაშორისო და ადგილობრივ დამკვირვებელ ორგანიზაციას რეაგირებისთვის. ამ ტიპის დანაშაულის დაუსჯელობა მხოლოდ იმის ნიშანი იქნება, რომ ხელისუფლება წინასაარჩევნო კამპანიის წარმართვას სწორედ ასეთი გზით გეგმავს. აღსანიშნავია, რომ ეს თავდასხმა სწორედ იმ დღეს მოხდა, როცა შს მინისტრმა გიორგი მღებრიშვილმა სპეციალური განკარგულება გამოსცა წინასაარჩევნოდ ძალადობის აღსაკვეთად", – აცხადებს ევროპული საქართველო.

On.ge-ს დაუკავშირდა შინაგან საქმეთა სამინისტროს. დამატებით ინფორმაციას მიღებისთანავე შემოგთავაზებთ ამავე სტატიაში.