გორში, სასტუმრო ვიქტორიას შესასვლელთან იოსებ სტალინის 3D ფორმატის ნახატი გამოფინეს. ქუჩაში გამვლელებს სტალინის ფოტოს დანახვა სასტუმროს ვიტრინიდან შეუძლიათ. სასტუმროს ამსახველი ვიდეოკადრები შიდა ქართლის საინფორმაციო ცენტრმა გაავრცელა.

სასტუმროს მეპატრონემ და საზოგადოება გორელების ხელმძღვანელმა, ზურაბ წკრიალაშვილმა On.ge-ს უთხრა, რომ ეს გადაწყვეტილება საბჭოთა კავშირის ბელადის პატივისცემის გამო მიიღეს. მისივე თქმით, გორელების საზოგადოებამ სტალინის ძეგლის აღდგენისთვის 25 ათასი ხელმოწერა შეაგროვა:

"ხალხს უნდა, რომ აღდგეს სტალინის ძეგლი, რომელიც მიხეილ სააკაშვილმა, იმ არაკაცმა და არაადამიანმა მოხსნა და დაანგრიეს. ვანდალიზმი მოახდინეს ღამის ორ საათზე. სტალინის ძეგლის გარშემო კაციშვილი ვერ მიდიოდა, რომ ეთქვა რატომ აკეთებთ მაგას."

კითხვაზე, თუ რამდენად მიზანშეწონილად მიაჩნია სტალინის ფოტოს გამოფენა, მაშინ როდესაც თავისუფლების ქარტიის მიხედვით, კომუნისტური ტოტალიტარული და ფაშისტური სიმბოლიკის საჯარო სივრცეში გამოყენება აკრძალულია, ზურაბ წკრიალაშვილმა გვიპასუხა:

"წაიკითხეთ თქვენ სტალინზე, ისტორიკოსები რასაც წერენ სტალინის შესახებ, კარგები ამოკრიფეთ იქიდან. თქვენ რასაც მელაპარაკებით საერთოდ არ მაინტერესებს, თქვენ ხართ ერთ-ერთ ჟურნალისტი ანტისტალინელი. გორის საზოგადოება გორელები არიან სტალინელები. გამოჩენილი აკადემიკოსებისა და ისტორიკოსების ძალიან ბევრ ნაშრომს და წერილს კითხულობენ და იმის საფუძველზე გვიყვარს ჩვენ ეს პიროვნება და პატივს ვცემთ."

საქართველოს ახალგაზრდა იურისტთა ასოციაციის იურისტის, გიორგი გოცირიძის თქმით, თუ კომუნისტური სიმბოლიკა ხელმისაწვდომია ეს დარღვევაა, რაზეც სახელმწიფო კომისიამ უნდა იმსჯელოს:

"ამ ვალდებულების შეუსრულებლობას [თავისუფლების ქარტიით გათვალისწინებული წესები დარღვევა] პირველ რიგში მოჰყვება პირველ ჯერზე პირის გაფრთხილება და გაფრთხილების პირობის განმეორებით შეუსრულებლობის შემთხვევაში მოჰყვება ათასლარიანი ჯარიმა."

არა ფობიას კვლევის ფარგლებში, არაერთხელ გამოვლენილა, რომ საზოგადოება გორელები სხვადასხვა ჯგუფების მიმართ დისკრიმინაციული გამონათქვამებით გამოირჩევიან.

2010 წლის 25 ივნისს, გვიან ღამით, გორის ცენტრში საბჭოთა ბელადის, იოსებ სტალინის ძეგლი აიღეს. ძეგლი გორში, სტალინის მუზეუმში გადაიტანეს, მის ადგილად კი 2008 წლის რუსეთ-საქართველოს ომში და ასევე სტალინური საბჭოთა რეპრესიების შედეგად დაღუპული ადამიანების ხსოვნისადმი მიძღვნილი მემორიალი დაიდგა.

ექსვმეტრიანი ბრინჯაოს ქანდაკება ცხრამეტრიან კვარლცხბეკზე 1952 წელს სტალინს მშობლიური გორის ცენტრში სიცოცხლეშივე დაუდგეს.