ARD/Infratest-ის ეგზიტპოლის თანახმად, გერმანიის საპარლამენტო არჩევნებზე პირველი ადგილი ქრისტიან-დემოკრატიულმა კავშირმა (CDU) დაიკავა 29%-ით. მას მოსდევს ულტრამემარჯვენე პარტია AfD ხმების 19.5%-ით.

ეგზიტპოლის თანახმად, შედეგები ასე ნაწილდება:

ქრისტიან დემოკრატები (CDU-CSU) - 29%
ალტერნატივა გერმანიისთვის (AFD) - 19,5%
სოციალ-დემოკრატიული პარტია (SPD) - 16%
მწვანეები - 13.5%
მემარცხენეები - 8.5%

არჩევნების შემდეგ კოალიციის ფორმირებაზე მნიშვნელოვან გავლენას მოახდენს რამდენი პარტია შეძლებს ბუნდესტაგში შესვლას და 5%-იანი ბარიერის გადალახვას. საზოგადოებრივი აზრის კვლევებით, ბარიერის ზღვარზეა ორი პარტია - მემარცხენე-პოპულისტური, ევროსკეპტიკური სარა ვაგენკნეხტის კავშირი და ლიბერალური FDP. ამ პარტიების პარლამენტში შესვლა გაართულებს 2 პარტიის მიერ სამთავრობო კოალიციის შექმნას.

შეგახსენებთ, გერმანიის ბუნდესტაგმა 16 დეკემბერს უნდობლობა გამოუცხადა კანცლერ ოლაფ შოლცის მთავრობას, რის შემდეგაც ქვეყნის პრეზიდენტმა, ფრანკ-ვალტერ შტაინმაიერმა, პარლამენტის დათხოვნის გადაწყვეტილება მიიღო.

ეგზიტპოლის მიხედვით, გერმანიის კანცლერის, ოლაფ შოლცის მემარცხენე სოციალურ-დემოკრატიული პარტია კი მესამე ადგილზეა.

ოლაფ შოლცმა ოპოზიციის ლიდერს, ფრიდრიხ მერცს საპარლამენტო არჩევნებზე პირველი ადგილის დაკავება მიულოცა და აღნიშნა, რომ პასუხისმგებლობას იღებს პარტიის წარუმატებლობაზე.

"არჩევნების შედეგს ვულოცავ ფრიდრიხ მერცს, ქრისტიან-დემოკრატიულ და ქრისტიან-სოციალურ პარტიებს. ჩვენ დემოკრატიულ ქვეყანაში ვცხოვრობთ და დემოკრატიისთვის ვიბრძვით, სწორედ ამიტომ მინდა ვთქვა, რომ ულტრა-მემარჯვენე პარტია AfD-ს შედეგი არ არის რაღაც, რასაც დავივიწყებთ და შევეგუებით," — განაცხადა ოლაფ შოლცმა.

მთავრობაში კრიზისი 6 ნოემბერს დაიწყო, როდესაც კანცლერმა შოლცმა ფინანსთა მინისტრი, თავისუფალი დემოკრატების ლიდერი ქრისტიან ლინდნერი, თანამდებობიდან გადააყენა. ამის შემდეგ მმართველი კოალიცია, რომელიც სოციალ-დემოკრატიული პარტიისგან (SPD), მწვანეებისა (GRÜNE) და თავისუფალი დემოკრატებისგან (FDP) შედგებოდა, ოფიციალურად დაიშალა.