დღეს, 8 თებერვალს, ბათუმიდან მზია ამაღლობლის მშობლიური ჭვანის ხეობის მიმართულებით საპროტესტო საავტომობილო მსვლელობა გაიმართა. მსვლელობის მონაწილეები შეხვდნენ ჭვანის მოსახლეობას, ისაუბრეს მათთან მზია ამაღლობელის მდგომარეობასა და მიმდინარე მოვლენებზე — ჭვანას მოსახლეობამ მხარდაჭერა გამოუცხადა უკანონოდ დაკავებულ თანასოფლელს და მისი და სხვა პოლიტპატიმრების გათავისუფლების მოთხოვნას შეუერთდა.

დემონსტრანტები შეჩერდნენ შუახევის მერიის შენობის წინ და იქ საპროტესტო აქცია გამართეს — აქტივისტები მხარდაჭერას უცხადებენ უწყვეტი პროევროპული აქციების უკანონოდ დაკავებულ მონაწილეებს და მათ გათავისუფლებას ითხოვენ.

ბათუმელების და ნეტგაზეთის დამფუძნებელი და დირექტორი, მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". მანამდე ამავე საბაბით აქციაზე დააკავეს კიდევ 9 ადამიანი. რამდენიმე საათში დაკავებულთაგან ოთხი — მზია ამაღლობელი, თეონა ბერიძე, ციალა ქათამიძე და ნანა შავაძე გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს ორ სხვა პირთან ერთად.

მზია ამაღლობელს შსს სისხლის სამართლის კოდექსის 353 პრიმა მუხლის I ნაწილით გათვალისწინებული დანაშაულის ჩადენას ედავება, რაც პოლიციელზე თავდასხმას გულისხმობს და სასჯელის სახით 5-დან 7 წლამდე პატიმრობას ითვალისწინებს.

ასევე იხილეთ: მზია ამაღლობელის დაკავების ქრონიკა — სასამართლო მის მიმართ აღკვეთის ღონისძიების შეფარდებაზე დღეს იმსჯელებს

საქართველოს ახალგაზრდა იურისტთა ასოციაციის თავმჯდომარის, ნონა ქურდოვანიძის, ცნობით, დაკავების შემდეგ მზია ამაღლობელი დამამცირებელი მოპყრობის მსხვერპლი გახდა — მას ბათუმის პოლიციის უფროსმა ირაკლი დგებუაძემ შეაფურთხა, მიაყენა სიტყვიერი შეურაცხყოფა და რამდენიმე საათის განმავლობაში არ აძლევდა საპირფარეშოთი სარგებლობის უფლებასაც. მზია ამაღლობელი 28-ე დღეა შიმშილობს, რამდენიმე დღის წინ ის კლინიკა "ვივამედში" გადაიყვანეს.

ასევე იხილეთ: ნონა ქურდოვანიძე: მიუხედავად იმისა, რომ მზიამ უარი თქვა საკვების მიღებაზე, იქვე დაუტოვეს — ეს არის ფსიქოლოგიური ზეწოლის დამატებითი ფორმა