ქართული ოცნების პრემიერმინისტრმა 8 თებერვალს, ბათუმში, ჟურნალისტების კითხვებს უპასუხა. ერთ-ერთი კითხვა შეეხებოდა ბათუმელებისა და ნეტგაზეთის დამფუძნებლის, მზია ამაღლობელის პატიმრობასა და შიმშილობას. კობახიძემ მზია ამაღლობელის საქციელს "მძიმე სამართალდარღვევა" უწოდა, რომელსაც "სახელმწიფოს მხრიდან რეაგირება სჭირდებოდა".

"რაც შეეხება მზია ამაღლობელის წინასწარ პატიმრობას, ეს არ არის ჩემი გადასაწყვეტი, ეს არის შესაბამისი უწყებების გადასაწყვეტი — ასეთ საკითხებზე გადაწყვეტილებას იღებენ პროკურატურა და სასამართლო ხელისუფლება. მე შემიძლია, მხოლოდ საერთო შეფასება გავაკეთო იმ სამართალდარღვევის, რაც იქნა ჩადენილი. ეს არის მძიმე სამართალდარღვევა თავისი საერთო შეფასებით — არ შეიძლება, ვიღაცამ სცადოს, ასე მარტივად ხელი აღმართოს სახელმწიფოზე, სახელმწიფოს წარმომადგენელზე, პოლიციელზე — ეს არის მძიმე სამართალდღვევა, რომელსაც სჭირდებოდა რეაგირება სახელმწიფოს მხრიდან, როგორი უნდა იყოს ეს რეაგირება, ამაზე გადაწყვეტილებას იღებენ შესაბამისი უწყებები და ყველამ პატივი უნდა სცეს შესაბამისი უწყებების გადაწყვეტილებას. მთავარი პრობლემა აქ არის ის, რომ ვერ ვხედავთ ვერავითარ სინანულს — პოლიციელს გაარტყეს სახეში ხელი და ნული სინანული ამასთან დაკავშირებით... არც კონკრეტულად ბრალდებულის და არც მისი კოლეგების მხრიდან. ეს არის, რა თქმა უნდა, უკიდურესად შემაშფოთებელი, დანარჩენზე საზოგადოებამ უნდა გააკეთოს თავისი შეფასება", — განაცხადა ოცნების პრემიერმინისტრმა.

ერთ-ერთი შეკითხვა შეეხებოდა კობახიძის ჟურნალისტებთან შეხვედრასაც, რისი სურვილიც ბათუმელების მთავარმა რედაქტორმა, ეთერ თურაძემ გამოთქვა. ირაკლი კობახიძემ შეხვედრაზე უარი განაცხადა და ამის მიზეზად დაასახელა ის, რომ მასთან "სამართლებრივ საკითხებზე საუბარსა" და "ადვოკატთან ერთად შეხვედრას" აპირებდნენ.

"რაც შეეხება [ეთერ თურაძესთან] შეხვედრას, მე ველოდი, რომ გარკვეული სინანული დაედებოდა ფონად იმ ინიციატივას, რომელიც მოვისმინეთ გარკვეული ადამიანების მხრიდან, თუმცა არავითარი სინანული — მათ უნდათ სამართლებრივი საკითხების გარჩევა, ადვოკატთან ერთად აპირებდნენ ჩემთან მოსვლას... სამართლებრივი საკითხები ჩემთან ვერ გაირჩევა — მე არ ვარ არც ადვოკატი, არც მოსამართლე — სამართლებრივი საკითხები უნდა გაირჩეს პროკურატურაში და სასამართლოში, ეს არის შესაბამისი უწყებები. თუ ვინმეს უნდა, გამოხატოს სინანული, რა თქმა უნდა, ეს იქნებოდა ძალიან მნიშვნელოვანი, ეს იქნებოდა სახელმწიფოს მიმართ პატივისცემის გამოხატულება და ამის შემდეგ, შეიძლება დავიწყოთ საუბარი ნებისმიერ თემაზე, მათ შორის შეხვედრებზე და ასე შემდეგ. მაგრამ, როდესაც ხედავ, რომ არათუ სინანულს არ გამოხატავენ კონკრეტული სამართალდარღვევის გამო, არამედ ცდილობენ ასეთი სამართალდარღვევების წახალისებას, ეს, რა თქმა უნდა, არის უკიდურესად მიუღებელი და ამის მიმართ ჩვენ ვერ ვიქნებით ლოიალური. კიდევ ერთხელ, სინანული არის მთავარი, რაც არის ახლა გამოსახატი", — განაცხადა ირაკლი კობახიძემ.