უცხო ქვეყნის მოქალაქეს აქვს ლიეტუვაში შესვლის მოთხოვნის ნულოვანი უფლება. სრულად ლიეტუვის სუვერენული პრეროგატივაა ვის შეუშვებს და ვის არა. უფლება არ არსებობს და ეს სასამართლოში ითხოვს დაცვას, – ამის შესახებ სოციალურ ქსელში კონსტიტუციონალისტი დავით ზედელაშვილი წერს და უზენაესი სასამართლოს სისხლის სამართლის საქმეთა პალატის თავმჯდომარე, შალვა თადუმაძის გეგმას ეხმაურება, რომელსაც დასანქცირების გამო ადამიანის უფლებათა ევროპულ სასამართლოს სურს მიმართოს.

"სახელმწიფოს აქვს სუვერენული, პრეროგატიული უფლებამოსილება თავად გადაწყვიტოს ვის დაუშვებს ან ვის არ დაუშვებს თავის ტერიტორიაზე. ეს არის პრეროგატივა რომელიც არ ექვემდებარება, მათ შორის, სასამართლო წესით გადასინჯვას. შესაძლებელია გამონაკლისი თავად სახელმწიფომ დააწესოს ქვეყნის შიგნით, რომ თავის სასამართლოებს მისცეს შეზღუდვად ამის კონტროლის შესაძლებლობა.

რაც შეეხება ადამიანის უფლებათა ევროპული სასამართლო დონეზე დიდ პალატას, არ არსებობს ასეთი უფლება იმასთან მიმართებით, რომ დაშვებული იყო უცხო ქვეყნის ტერიტორიაზე. ეს შეეხება როგორ სავიზო აპლიკაციებს, ასევე სავიზო აპლიკაციის გარეშე უცხო ქვეყნის მიერ მიღებულ გადაწყვეტილებას არ დაგიშვას თავის ტერიტორიაზე. რაც არ წარმოშობს უფლებას, რომელიც, მათ შორის, ბატონ თადუმაძეს მისცემდა უფლებას, ედავა ლიტვის სასამართლოებში. ასეთი უფლება არ არსებობს, იმიტომ, რომ არ გააჩნია არსებითი უფლება, რომ მოითხოვოს ან უფლებიდან გამომდინარე მოლოდინი ჰქონდეს, რომ ლიტვამ ის თავის ტერიტორიაზე დაუშვას", — განაცხადა კონსტიტუციონალისტმა დავით ზედელაშვილმა NEWS.On.ge-სთან.

დღეს გავრცელდა ინფორმაცია იმის შესახებ, რომ უზენაესი სასამართლოს სისხლის სამართლის საქმეთა პალატის თავმჯდომარე, შალვა თადუმაძე გეგმავს დასანქცირების გამო ადამიანის უფლებათა ევროპულ სასამართლოს მიმართოს.

თადუმაძემ ოცნების საგარეო საქმეთა მინისტრ მაკა ბოჭორიშვილს წერილი მისწერა, სადაც სთხოვს, საერთაშორისო სამართლით დადგენილი წესის თანახმად, საგარეო უწყებამ მოიწვიოს ლიეტუვის რესპუბლიკის ელჩი და უზრუნველყოს ამ შეხვედრაზე მისი დასწრება, რათა ოფიციალური პირისგან მიიღოს განმარტება, თუ რის საფუძველზე მიიღო ლიეტუვის საგარეო საქმეთა სამინისტრომ საღ აზრს მოკლებული გადაწყვეტილება და მოიხსენია იგი დასანქცირებულთა სიაში, როგორც "ქართველი პოლიტიკოსი".

"მოგეხსენებათ, ლიეტუვის საგარეო საქმეთა სამინისტრომ გაასაჯაროვა საქართველოს მაღალი თანამდებობების მქონე დასანქცირებული პირების სია, რასაც წინ უძღოდა ლიეტუვის საგარეო საქმეთა მინისტრის – კესტუტის ბუდრისის – საჯარო განცხადება, რომ ძალადობის და მშვიდობიანი მომიტინგეების, ჟურნალისტებისა და ოპოზიციონერების ჩაგვრის შედეგად, ესტონეთთან თანამშრომლობით გააფართოვა დასანქცირებული ქართველი პოლიტიკოსების სია.

აღნიშნული განცხადებით, ლიეტუვის საგარეო საქმეთა მინისტრმა, სიის თითოეული პირი, მათ შორის, მეც დაგვადანაშაულა საქართველოში ადამიანის ძირითადი უფლებების უხეშ დარღვევაში.

მოგმართავთ თხოვნით, საერთაშორისო სამართლით დადგენილი წესის თანახმად, თქვენდამი დაქვემდებარებულმა უწყებამ (თანამდებობის პირმა) მოიწვიოს ლიეტუვის რესპუბლიკის ელჩი და უზრუნველყოს აღნიშნულ შეხვედრაზე ჩემი დასწრება, რათა ოფიციალური პირისაგან განმემარტოს, თუ რის საფუძველზე მიიღო ლიეტუვის საგარეო საქმეთა მინისტრმა საღ აზრს მოკლებული გადაწყვეტილება და მომიხსენია დასანქცირებულთა სიაში, როგორც „ქართველი პოლიტიკოსი", – აღნიშნულია წერილში.