"რკინიგზა რკინიგზელებს!" - თბილისში სოლიდარობის აქცია მიმდინარეობს

საქართველოს რკინიგზის გურჯაანში დასაქმებულებმა შიმშილობის დაწყების მესამე დღეს რკინიგზის დეპარტამენტთან აქცია გამართეს. მათ სოლიდარობას უცხადებენ აუდიტორია 115-სა და რკინიგზელთა ახალი პროფკავშირის წევრები.

საქართველოს რკინიგზის გურჯაანში დასაქმებულმა ორმა თანამშრომელმა შიმშილობა 15 აგვისტოს დაიწყო. დღევანდელ აქციაზე კიდევ შვიდმა ადამიანმა, მათ შორის, რკინიგზის ახალი პროფკავშირების წევრებმა მიიღეს გადაწყვეტილება, შეერთებოდნენ შიმშილობის აქციას.

რკინიგზელთა ახალი პროფკავშირების წარმომადგენლების განცხადებით, შიმშილობის მიზეზი სამუშაო ადგილის ცვლილება და ამ პროცესთან დაკავშირებული გადაწყვეტილებაა.

მათ მოხოვნებთა სიას, ტრანსპორტისა და საცხოვრებლის უზრუნვეყოფასთან ერთად, დაემატა რკინიგზის პრესსამსახურის უფროსის დაჩი ცაგურიასა და საქართველოს რკინიგზის ინფრასტრუქტურის დირექტორის, ვასილ ხორავას გათავისუფლება.

აქციის მოანწილეებს დღეს ჰქონდათ მცდელობა, რომ გაეშალათ კარავი, თუმცა პატრულმა ამის შესაძლებლობა არ მისცა, რაზეც სასამართლოსაც მიმართეს. აქციის მოანაწილეები მოუწოდებენ პატრულის თანამშრომლებს დაემორჩილონ სახალხო დამცველის მითითებებს, რომ მისცენ კარვის გაშლის შესაძლებლობა.

ერთ-ერთი მოშიმშილე უჩა ხვთისიაშვილი On.ge-სთან ჰყვება, რომ პირველ აგვისტოს, საქართველოს რკინიგზის გადაწყვეტილებით, ისინი გურჯაანიდან თბილისი-მარნეულის რეგიონზე გადმოიყვანეს, თუმცა რკინიგზა არ უზრუნველყოფს მათი ტრანსპორტირებისა და საცხოვრებლის ხარჯებს. მოშიმშილე თანამშრომლების განცხადებით, ცვლილებების შესახებ მათ პირველ აგვისტოს, კომპანიის წარმომადგენლებთან გამართულ შეხვედრაზე, ზეპირად აცნობეს, ხოლო შედეგად, ტრანსპორტირებისა და საცხოვრებლის ხარჯების დაფარვა მათ მოუწევთ.

On.ge-სთან საუბარში საქართველოს რკინიგზის პრესსამსახურის უფროსმა დაჩი ცაგურიამ განაცხადა, რომ გურჯაანის რეგიონში რკინიგზის დაბალი დატვირთვიდან გამომდინარე აღარ არსებობდა იმ სამუშაოს საჭიროება, რასაც მუშები ასრულებდნენ. ცაგურიას განმარტებით, კომპანიამ გადაწყვიტა თანამშრომლების თბილისი-მარნეულის რეგიონში გადმოყვანა, რაც მუშებთან შეთანხმებული იყო.

მისივე თქმით, კომპანია უზრუნველყოფს მუშების ტრანსპორტირებასა და საცხოვრებელს და გავრცელებულ ინფორმაციას სიცრუეს უწოდებს.

მუშები თავდაპირველ სამუშაო ადგილზე დაბრუნებას, ან აღნიშნული ხარჯების უზრუნვლყოფას მოითხოვენ, წინააღმდეგ შემთხვევაში ისინი შიმშილობას გააგრძელებენ.

რკინგეზელთა პროფკავშირის წარმომადგენელი ილია ლეჟავა ამბობს, რომ მოშიმშილე თანამშრომლებს, თბილისში, სამსახურში გამოუცხადებლობის შემთხვევაში, გაათავისუფლებენ.

ბოლო ამბები:

გირჩევთ