10 ოქტომბერს თბილისის საქალაქო სასამართლომ პრეცედენტული გადაწყვეტილება მიიღო და სახელმწიფო დაწესებულებებს შეზღუდული შესაძლებლობის მქონე ლ.ღ–სთვის სერვისის მიწოდებაზე უარის გამო, მორალური ზიანის ანაზღაურება და 12 000 ლარის გადახდა დააკისრა.

ლ.ღ-ს სჭირდებოდა პერსონალური ასისტენტის მომსახურება, მთავრობა, ჯანდაცვის სამინისტრო და სახელმწიფო ზრუნვის სააგენტო ინფორმირებული იყო ბავშვის ჯანმრთელობის მდგომარეობის, ქცევის სირთულისა და პერსონალური ასისტენტის გადაუდებლად დანიშვნის საჭიროების შესახებ.

სახელმწიფოს მხრიდან შესაბამისი სერვისის მიწოდებაზე უარის გამო ლ.ღ-ს თვეების გატარება უწევდა ფსიქიატრიულ დაწესებულებაში, სადაც ის ძალადობის მსხვერპლი გახდა.

NEWS.On.ge სასამართლოში ლ.ღ-ს ინტერესების დამცველს, იურისტს, უფლებადამცველს ანა არგანაშვილის ესაუბრა. არგანაშვილის თქმით, საქმე პრეცედენტულია, რადგან დამდგარი შედეგი ლ.ღ-ს გარდა სხვა შშმ პირებსაც დაეხმარება.

"მინდა იმით დავიწყო, რომ საქართველოში, როგორც მსოფლიოში მოსახლეობის 15 დან 18%-მდე არის შეზღუდული შესაძლებლობის პირი, მათ შორის არიან, როგორც ხანდაზმულები ასევე ბავშვები და მათთვის სერვისების შექმნა მნიშვნელოვანია.

აქამდე სახელმწიფოს ჰქონდა ასეთი არგუმენტი, რომ თუ არ არის ეკონომიკა აყვავებული, ისინი ვერ შექმნიან სერვისებს და შშმ პირები და მათი ოჯახები უნდა დაელოდონ ეკონომიკის აყვავებას. ლ.ღ-ს საქმე იყო კონკრეტული შემთხვევა, ბავშვი, რომელსაც ჰქონდა შეზღუდული შესაძლებლობა მხოლოდ იმიტომ გამოკეტეს ფსიქიატრიულში, რომ სახელმწიფოს არ ქონდა შესაბამისი სერვისები, რომ ამ ბავშვს დახმარებოდა. აი ამ პრეცედენტულმა საქმემ, ეს ყველაფერი შეცვალა. პირველ რიგში, პირველივე დროებით გადაწყვეტილებით სახელმწიფოს დაევალა, რომ დაენიშნათ ბავშვისთვის პერსონალური ასისტენტი. რომელიც რეალურად ძალიან ბევრს სჭირდება, მათ შორის ხანდაზმულ ადამიანებს, რომლებიც მარტო არიან და დახმარება სჭირდებათ. სასამართლომ ამით ზუსტად ის თქვა, რომ სახელმწიფო მსგავს შემთხვევაში ვალდებულია შშმ პირი უზრუნველყოს შესაბამისი სერვისებით.

მეორე ის, რომ სახელმწიფოს დაევალა ბავშვისთვის 12 ათასი ლარის გადახდა." — ამბობს იურისტი.

იურისტმა ასევე აღნიშნა, რომ შშმ პირებს, რომელსაც სჭირდება დახმარება და ვერ სარგებლობენ შესაბამისი სერვისებით. მათ უფლება აქვთ ეს ყველაფერი სახელმწიფოდან სასამართლოს გზით მოითხოვონ.

"შშმ პირებს შეუძლიათ უკვე სასამართლოს გზით მოითხოვონ ის სერვისები, რომლებსაც აქამდე ვერ იღებდნენ. მათ ამისთვის რა თქმა უნდა ადვოკატების დახმარება დასჭირდებათ იმიტომ რომ ეს საქმე იყო გარდა ეროვნული კანონმდებლობისა საერთაშორისო კანონმდებლობაზე დაფუძნებული საერთაშორისო პრეცედენტულ სამართალზე და ამიტომ ადვოკატების ჩართვა ძალიან მნიშვნელოვანი იქნება, ყველა შშმ პირს ეკუთვნის სახელმწიფოს ხარჯზე ადვოკატი სახელმწიფო იურიდიული დახმარების სამსახურიდან ან ისეთი არასამთავრობოდან, როგორიც არის "პარტნიორობა ადამიანის უფლებებისთვის". (თუ ძალიან მალე არ დახურეს, რადგან რუსული კანონის გამო, რეალურად სწორედ ეს ემუქრება ამ ორგანიზაციას)," — აღნიშნავს არგანაშვილი.