დღეს, 11 ივნისს, ე.წ. საოკუპაციო ხაზთან საზღვრის უკანონო კვეთის ბრალდებით მესაზღვრეებმა საქართველოს ორი მოქალაქე დააკავეს. შემთხვევა სოფელ ბერშუეთში მოხდა. ინფორმაცია ამის შესახებ On.ge-ს სახელმწიფო უსაფრთხოების სამსახურში დაუდასტურეს.

მამა-შვილი, როინ და გიორგი ზაუტაშვილები ე.წ. მესაზღვეებმა მაშინ დააკავეს, როდესაც ისინი პირუტყვს მწყემსავდნენ. ისინი ქართული მხარის კონტროლირებადი ტერიტორიიდან წაიყვანეს. ჯარიმის გადახდის შესახებ ოჯახს ჯერ არავინ შეხმიანებია.

როგორც გიორგი ზაუტაშვილის მეუღლე, ლელა აკოფაშვილი ამბობს, რომ მას შემდეგ, რაც მისი მეუღლე და მამამთილი საძოვარზე წავიდნენ, მათ მისმა შვილმა მიაკითხა:

"ტირილით დამირეკა ჩემმა შვილა, მამა წაიყვანესო. საშინელი მდგომარეობა იყო. მეტი არაფერი ვიცით, ეხლაც ზარი გადის და არავინ არ გვპასუხობს. ეს არის ჩვენი ინფორმაცია, მეტი არაფერი".