"აღმოჩნდა რომ მე-12 კლასის მოსწავლეებისთვის იწერება საქართველოს ისტორიის ექსკლუზიურად საავტორო მასალა-რესურსი, რომლის რედაქტორიცაა გიორგი სოსიაშვილი. პარლამენტის წევრი და 84 დეპუტატიდან ერთ-ერთი, რომელმაც ხელი მოაწერა რუსულ კანონს", — ამის შესახებ სოციალურ ქსელში ისტორიის მასწავლებელი და მკვლევარი, გიორგი ჯავახიშვილი წერს. მისივე თქმით, გიორგი სოსიაშვილი 13 სექტემბერს გორში ბიძინა ივანიშვილის ანტიეროვნულ, მოღალატეობრივ სიტყვებს უკრავდა ტაშს.

"აღმოჩნდა რომ მე-12 კლასის მოსწავლეებისთვის იწერება საქართველოს ისტორიის ექსკლუზიურად საავტორო მასალა-რესურსი, რომლის რედაქტორიცაა გიორგი სოსიაშვილი. პარლამენტის წევრი და 84 დეპუტატიდან ერთ-ერთი, რომელმაც ხელი მოაწერა რუსულ კანონს. ადამიანი, რომელიც 13 სექტემბერს გორში ბიძინა ივანიშვილის ანტიეროვნულ, მოღალატეობრივ სიტყვებს ტაშს უკრავდა", — წერს გიორგი ჯავახიშვილი.

მისი ვარაუდით, გიორგი სოსიაშვილი ამ პროექტშია იმიტომ, რომ ცენზორის როლი გასწიოს და გააკონტროლოს ყველა სიტყვა, რაც საქართველოს უახლეს, მეტად მტკივნეულ პერიოდს ეხება.

გიორგი ჯავახიშვილი წერს, რომ ორი რისკი იკვეთება:

"ვფიქრობ ცალსახაა ორი რისკი:

1. არაერთხელ გაჟღერებულა შიშები რომ განათლების სამინისტროს უნდა ყველა საგანში ექსკლუზიურად ერთი სახელმძღვანელოსკენ წავიდეს, რაც სრულად ეწერება იმ პოლიტიკურ გემოვნებაში, რომელსაც ქართული ოცნების ავტორიტარული მმართველობა ჰქვია. ერთი ბელადი, ერთი პარტია, განსხვავებულობის აკრძალვა პოლიტიკურ ველზე თუ სასწავლო პროცესში. ორად გაყოფილ ისტორიის საგანში ამის მოსინჯვა და დანერგვა ყველაზე მარტივია. ჯერ რესურსი დაერქმევა და მერე მარტივად "გადაითარგმნება" სახელმძღვანელოში.

2. პარლამენტარი გიორგი სოსიაშვილი საერთოდ არაა არც საქართველოს უახლესი ისტორიის სპეციალისტი (ყოველ შემთხვევაში ქართული ვიკიპედია მასზე ამბობს რომ მისი დისერტაციის სათაურია: "ქართლის სათავადოების ისტორიიდან (სამაჩაბლო)".

ის არც სწავლების მეთოდიკის მცოდნე არაა, რომ რედაქტორობა გაუწიოს სკოლისთვის სასწავლო რესურსს.

დიდი ალბათობით, ის ამ პროექტში არის იმიტომ, რომ ცენზორის როლი გასწიოს და გააკონტროლოს ყველა სიტყვა, რაც საქართველოს უახლეს, მეტად მტკივნეულ პერიოდს ეხება. მაგალითად, ამ პერიოდის ამსახველ სახელმძღვანელოებში საკითხად იყო ხოლმე გამოტანილი 2008 წლის ომი. დღევანდელი გადასახედიდან გასაგებია რა ტიპის ტექსტები და დავალებები შეიძლება ვიხილოთ ამ მიმართულებით სოსიაშვილის გარედაქტირებულ საქართველოს ისტორიის რესურსში.

გიორგი სოსიაშვილი იმ პარტიის მდუმარე და ყველაფრის ხელმომწერი დეპუტატია, რომელიც მტრისა და მეგობრის აღრევას ცდილობს ქართული საზოგადოების ცნობიერებაში და საქართველოს მომავალს ბოროტად ეთამაშება.

მინდა შეგახსენოთ, რომ წელს გამოცდებს აბარებს ის თაობა, რომელიც 2008 წლის ომამდე რამდენიმე თვით ადრე დაიბადა. გამოცდებს აბარებენ იმ სამხედროების შვილებიც, რომლებიც 2008 წლის აგვისტოში გმირულად დაეცნენ", — წერს გიორგი ჯავახიშვილი.

სასწავლო მასალა-რესურსის ავტორები თბილისის სახელმწიფო უნივერსიტეტის პროფესორი დიმიტრი შველიძე და განათლების სამინისტროს ეროვნული სასწავლო გეგმის განვითარების ექსპერტი, ნიკო სილაგაძე არიან.

ისტორიის პროფესორი და წიგნის ერთ-ერთ ავტორი, დიმიტრი შველიძე პუბლიკასთან აცხადებს, რომ გიორგი სოსიაშვილს მისი დაწერილი არც ერთი სიტყვა არ შეუსწორებია. მისივე თქმით, ის რუსულ კანონს არ იზიარებს. თუმცა, ამ კანონის მხარდამჭერ "ზოგიერთ ადამიანთან ურთიერთობა შეიძლება".

იმის გასარკვევად, რა კრიტერიუმით შეირჩა გიორგი სოსიაშვილი მე-12 კლასის საქართველოს ისტორიის მასალა-რესურსის რედაქტორად, NEWS.On.ge-მ განათლების და მეცნიერების სამინისტროს ეროვნული სასწავლო გეგმის განვითარების ექსპერტთან და ამავე წიგნის მეორე ავტორთან, ნიკო სილაგაძესთან სცადა დაკავშირება. მან განათლების სამინისტროს პიართან გადაგვამისამართა შეხვედრის ჩასანიშნად და გვითხრა, რომ "ასეთ საკითხებს შეხვედრებზე განიხილავენ და არა ტელეფონზე".

NEWS.ON.ge თემაზე მუშაობას აგრძელებს.