არის რაღაცები, რისი დაჯერებას შეუძლებელია თუ საკუთარი თვალით არ ნახავ, თუმცა ხანდახან მისი ნახვის შემდეგაც კი გიჭირს დაიჯერო.

სწორედ ასეთია ბრიტანელი ვილარდ ვიგანის ნამუშევრები, რომელიც მიკროსკოპულ სკულპტურებს ქმნის. ის მიკროსკოპული სკულპტურებისთვის ფუნჯად ბუზის ბუსუსს იყენებს, ხოლო თვითონ სკულპტურებს ბრინჯის მარცვლისგან და შაქრისგან ამზადებს.

ფოტო: Willard Wigan

ვილარდ ვიგანი ქმნის მიკროსკოპულ ხელოვნებას სკულპტურების სახით, რომლებიც შეუიარაღებელი თვალით არ ჩანს. მის მიერ შექმნილი ქანდაკებები იმდენად პატარაა, რომ ადამიანი ვერ ხედავს, თუმცა მაინც არ შეუძლია თვალი მოსწყვიტოს.

ფოტო: Willard Wigan

ვილარდ ვიგანი და მისი პატარა ქანდაკებები ორჯერ მოხვდა გინესის რეკორდების წიგნში. პირველად, 2013 წელს, ოქროს მოტოციკლის სკულპტურით, მეორედ კი 2017 წელს, ადამიანის ემბრიონის სკულპტურის შექმნისთვის. ემბრიონის ქანდაკება გინესის მსოფლიო რეკორდების წიგნის მიხედვით 0,05388 მმ იყო.

ვიგანის მიერ შექმნილი ყველაზე დიდი სკულპტურა ქალია, რომელიც ვიოლინოზე უკრავს, თუმცა მთელი ქანდაკება ნემსის ყუნწშიც კი ეტევა. მისი ზომა 0,08 მმ-ია.

ფოტო: Willard Wigan

ვიგანს შესაძლებლობა ჰქონდა დედოფალი ელიზაბეთიც გაეხარებინა. მან დედოფლის სამეფო ეტლის სკულპტურა დაამზადა. ეტლი ოქროსი იყო და ხელოვანს ყველა დეტალი გათვალისწინებული ჰქონდა. დედოფალ ელიზაბეთს ქანდაკების დასათვალიერებლად მიკროსკოპის გამოყენება მოუწია და მიუხედავად იმისა, რომ ნახა, ვერ დაიჯერა, რომ ეს ნამდვილი იყო.

ფოტო: Willard Wigan

ვილარდ ვიგანი დაიბადა 1957 წელს, ვენდესფილდში(ინგლისი) ბავშვობიდანვე იგი დისლექსიით იტანჯებოდა, რის გამოც გამუდმებით არა მარტო თანაკლასელების, არამედ პედაგოგების მხრიდანაც დაცინვის ობიექტი იყო, ამის გამო ვიგანი გაერიყა საზოგადოებას და პატარაობიდანვე დაიწყო მიკროსკულპტურების შექმნა, რითაც სურდა დაემტკიცებინა, რომ ადამიანს თუ რაიმე ნაკლი აქვს, სხვა მხრივ შეუძლია გამოავლინოს ნიჭი.რაც წლები გადიოდა, ვიგანის სკულპტურების ზომა მით უფრო მცირდებოდა.

ფოტო: Willard Wigan

2004 წლიდან მოყოლებული ვიგანის ნამუშევრების პერსონალური გამოფენები რეგულარულად ეწყობა როგორც სამშობლოში, ასევე მის ფარგლებს გარეთ.