ირანის საგარეო საქმეთა მინისტრი, სეიედ აბბას არაღჩი ამერიკის შეერთებული შტატების მიერ ირანის ბირთვულ ობიექტებზე მიტანილ იერიშს სოციალურ ქსელში გამოეხმაურა.

მან გაეროს მოუწოდა, რომ აუცილებელია ამ ფაქტზე რეაგირება მოახდინონ.

"ამერიკის შეერთებულმა შტატებმა, რომელიც გაეროს უშიშროების საბჭოს მუდმივი წევრია, ჩაიდინა სერიოზული დარღვევა გაეროს წესდების, საერთაშორისო სამართლისა და ბირთვული გაუვრცელებლობის ხელშეკრულების (NPT) მიმართ, როდესაც შეუტია ირანის მშვიდობიან ბირთვულ ობიექტებს.

დღევანდელი დილის მოვლენები შემაშფოთებელია და გრძელვადიანი შედეგები ექნება. გაეროს თითოეული წევრი ქვეყანა განგაშით უნდა შეხვდეს ამ უკიდურესად საშიშ, უკანონო და კრიმინალურ ქმედებას.

გაეროს წესდების თანახმად, რომელიც თვითდაცვის უფლებას აღიარებს, ირანი იტოვებს ყველა ვარიანტს, რათა დაიცვას თავისი სუვერენიტეტი, ინტერესები და საკუთარი ხალხი", — წერია განცხადებაში.

ცნობისთვის, შეერთებულმა შტატებმა 22 ივნისს ირანში სამ ძირითად ბირთვულ ობიექტზე, ფორდოუზე, ისპაჰანსა და ნათანზიზე, იერიში მიიტანა, რომლის შედეგადაც The Times of Israel-ის ცნობით, 86 ადამიანი დაშავდა. ატომური ენერგიის საერთაშორისო სააგენტოს ცნობით, დაბომბვის შედეგად ირანის ბირთვულ ობიექტებზე რადიაციის დონე არ გაზრდილა.