ჯორჯიან ეარვეისი თბილისი–თელ-ავივი–თბილისის მიმართულებით დაგეგმილი რეისის გაუქმებასთან დაკავშირებით განცხადებას ავრცელებს.

ავიაკომპანიის თქმით, რეისის გაუქმების მიზეზი უსაფრთხოებაა. მგზავრებს კი ბილეთების გადაცვლის ან თანხის დაბრუნების საშუალება ექნებათ.

"მგზავრთა საყურადღებოდ!

გაცნობებთ, რომ 24 ივნისს თბილისი–თელ-ავივი–თბილისის მიმართულებით დაგეგმილი რეისი უსაფრთხოებიდან გამომდინარე გაუქმებულია.

მგზავრებს, ვინც უკვე შეიძინა ბილეთები აღნიშნულ რეისზე, ვთავაზობთ ბილეთის გადაცვლის ან თანხის დაბრუნების შესაძლებლობას.

ბილეთის გადაცვლა ან თანხის დაბრუნება შესაძლებელია ბილეთის შეძენის ადგილას.

ჯორჯიან ეარვეისი , თელ-ავივის გარდა, სხვა მიმართულებებით დაგეგმილ რეისებს, შეუფერხებლად, განრიგის მიხედვით ასრულებს", — წერია განცხადებაში.

ცნობისთვის, ახლო აღმოსავლეთში დაძაბულობის უპრეცედენტო გამწვავების ფონზე, ისრაელმა 13 ივნისს, გამთენიისას, მასშტაბური სამხედრო იერიში მიიტანა ირანის ბირთვულ და სამხედრო ობიექტებზე. საჰაერო შეტევები, რომელიც ირანის წინააღმდეგ განხორციელებული ყველაზე ინტენსიური იერიში იყო ისრაელის თანამედროვე ისტორიაში, ძირითადად მიმართული იყო ბირთვულ ობიექტებზე, სარაკეტო ბაზებსა და ირანის უმაღლეს სამხედრო ხელმძღვანელობაზე. კონფლიქტის დაწყების შემდეგ ირანისა და ისრაელის საჰაერო სივრცეები ჩაიკეტა.