ჩინეთმა ამერიკის შეერთებული შტატები საერთაშორისო სამართლის დარღვევაში მას შემდეგ დაადანაშაულა, რაც აშშ-მა ირანის ბირთვულ ობიექტებზე საჰაერო იერიში მიიტანა. ჩინეთის საგარეო საქმეთა სამინისტრომ განაცხადა, რომ ამ ქმედებამ კიდევ უფრო გაამწვავა დაძაბულობა ახლო აღმოსავლეთში და მხარეებს ცეცხლის შეწყვეტისკენ მოუწოდა.

"ჩინეთი მკაცრად გმობს აშშ-ის თავდასხმებს ირანზე და იმ ბირთვულ ობიექტებზე საჰაერო შეტევებს, რომლებიც საერთაშორისო ატომური ენერგიის სააგენტოს (IAEA) კონტროლის ქვეშ იმყოფება.

აშშ-ის ქმედებები სერიოზულად არღვევს გაეროს წესდების მიზნებსა და პრინციპებს, ასევე საერთაშორისო სამართალს, და კიდევ უფრო ამწვავებს დაძაბულობას ახლო აღმოსავლეთში.

ჩინეთი მოუწოდებს კონფლიქტში ჩართულ მხარეებს — განსაკუთრებით ისრაელს — რაც შეიძლება სწრაფად მოიპოვონ ზავი, დაიცვან მშვიდობიანი მოსახლეობის უსაფრთხოება და დაიწყონ დიალოგი და მოლაპარაკებები.

ჩინეთი მზად არის ითანამშრომლოს საერთაშორისო საზოგადოებასთან, რათა გაერთიანებული ძალებით უზრუნველყოს სამართლიანობა და ხელი შეუწყოს მშვიდობისა და სტაბილურობის აღდგენას ახლო აღმოსავლეთში", — წერია განცხადებაში.

ცნობისთვის, შეერთებულმა შტატებმა 22 ივნისს ირანში სამ ძირითად ბირთვულ ობიექტზე, ფორდოუზე, ისპაჰანსა და ნათანზიზე, იერიში მიიტანა, რომლის შედეგადაც The Times of Israel-ის ცნობით, 86 ადამიანი დაშავდა. ატომური ენერგიის საერთაშორისო სააგენტოს ცნობით, დაბომბვის შედეგად ირანის ბირთვულ ობიექტებზე რადიაციის დონე არ გაზრდილა.